Hun engemaw chen atanga heavyweight fighter pahnih incho tawhte an inhmachhawn dawn tih a chiang. Social media leh media hrang hrang kaltlanga inhmachhawn an duh thu an sawi fo hnuah WBC world heavyweight champion Tyson Fury leh UFC world heavyweight champion hlui Francis Ngannou te ring chhungah boxing match-ah an intum dawn.
Boxing world champion lai leh mixed martial artist kutthlak na Ngannou te hi October 28 hian Saudi Arabia-ah an inhnek dawn tih anmahni ngeiin an puang.
Tyson Fury chuan an intum tur hi sawichiangin a WBC title inchuhna tur a ni lo tih a sawi tel a. An inhnekna tur erawh ‘exhibition’ bout ni lovin professional boxing record a kal turin engkim kalpui a ni dawn.
Professional boxing dan hnuaia inhnek tur an ni a, judge pathumin ‘10-point must system’ an hmang dawn tih a sawi chiang bawk.
“He pa hi khawvela hnek na ber ni anga an sawi a ni. Mahse Gypsy King hian a hnek fuh hunah engtinnge a awm kan hria ang chu.” tiin Fury chuan a sawi.
“Mipui hmaah, ring chhungah inlan hlan ka nghakhlel leh tawh hle. Khawvelah ‘The Gypsy King’ hi chhuan awm tawhte zinga fighter tha ber a nihna ka lantir duh.” tiin a sawi tel.
Ngannou pawhin, “Boxing a inel hi ka suangtuahna zinga awm reng thin a ni a, boxer tha ber berte hmachhawn hi ka duhthusam a ni thin. Khawvel MMA-ah heavyweight champion ka nih hnuah tun hun hi ka suangtuahna te a tak ram chantirna hun chu a ni a. Khawvela mi hlauhawm ber ka nihna nemnghehna hun chiah chu a ni.” tiin a sawi ve bawk.
“Tyson hi kum thum ka nghak tawh. Tuna ka sawi theih tawk chu ring chhungah nasa taka a chet kual a ngai ang, ka khawih fuh hlauh chuan a ding rei dawn lo.” tiin a sawi tel.
Engtin zel
WBC lamin an inhnek turah hian inrawlhna an neih loh tur thu an sawi a. Fury chu tunhnaiah amah chotu tura thlan an neih loh avangin ‘non-title bout’ a inlan phalna an pe tih an sawi chiang.
Fury hian kuminah Oleksandr Usyk nen ‘undisputed champion’ zawnna nei tura inhmachhawn turin inremna an neih theih loh avangin sum tam zawk siam theihna tur match neih a thlang ta zawk.
Fury-a co-promoter Frank Warren chuan Usyk hi Saudi Arabia lama inkhuar Skill Challenge Promotions te nen an thawhdun tak avangin kuminah a beiseiawm lo tih a sawi tel a. “Nakkum February-ah tiin anni lamin an sawi a. Midang zawngin anni hi kan ngaichang ngawt dawn a nih chuan thil theih a ni lo. Kan awm mai mai dawn bik lova, keini’n ruahmanna kan neih angin kan kal dawn.” a ti.
Usyk hian thla tharah WBA mandatory challenger Daniel Dubois a hmachhawn dawn. Fury nen hian December a inhnek turin an inrem thei lo.
Tyson Fury Professional boxing record:
Fight – 34 Win – 33 Loss – 0
By knockout 24 0
By decision 9 0
Draws 1
- Kum 2015 khan Wladimir Klitschko hnehin WBA (Super), IBF, WBO, IBO, leh The Ring heavyweight title a la.
- Kum 2020 khan WBC lehThe Ring heavyweight title a la.
- WBC heavyweight title hi tum thum a humhim tawh.
Francis Ngannou Professional MMA record:
Match : 20 Win – 17 Loss – 3
By knockout 12 0
By submission 4 0
By decision 1 3
- UFC Heavyweight Championship (Vawi khat)
- Heavyweight title hi vawikhat a humhim
- UFC Heavyweight division chanchinah knockout nei hnem ber pahnihna (10)
- UFC Heavyweight division-ah a khingpui a tawp thlenpui lova chak hnem ber pathumna (11)