Aizawl : Mizoram chief minister hlui Brig T Sailo tunu Meriam L Hrangchal chuan a pu Thenphunga policy tihlawhtling tura Congress party zawm a nih thu a sawi.
Nimin khan South Tuipui Block Conference, Hnahthial Bazar-a neihah, tun hnaia Congress party zawm thar Meriam L Hrangchal chuan Congress party a zawm chhan sawiin, “Ka pa, Lalhmingthanga khan Pu Thenphunga policy kha a tuipui em em a, kei ngei pawhin ka tuipui a ni. Pu Thenphunga policy ti hlawhtling turin Congress Party ah ka lut a. Pu Thenphunga policy tuipuitu leh PC party zawng zawngte pawh Thenphunga policy tihhlawhtlina a awm theihna tur atana Congress Party a rawn lut vek turin ka sawm che u a ni, a ti,” a ti.
Eizawnna pangngai tak a neih avangin atan politics-a sum leh pai zawn buai a ngai lo tih sawiin Mizorama Vestige company enkawltu Meriam L Hrangchal chuan, “Pathian zarah ka sumdawnnaah kan chhungkaw eikhawp chu kan la thawk chhuak ve thei. Mahse, kan ram, kan hnam, kan sakhua hi chhan a ngai nia ka hriat avanga politics-a rawn zuang lut ka ni. BJP te hian kan ram an ti chhe mek a. Kan hnam, kan sakhua min nekchep tumin hma an la mek a ni,” tia sawiin, BJP in India ram hi Hindu lal rama siam an tum avangin theihtawp chhuaha BJP do turin Congress Party-a lut a nih thu a sawi bawk.
Deputy chief minister Lalhmingthanga fanu Meriam L Hrangchal hi kumin MLA inthlanpuiah Congress ticket-a Lunglei South bial-a ding tura rin a ni.