Haiti police-te chuan kar kal taa President Jovenel Moïse-a thahnaa a mawhphurtu bera an hriat, doctor pakhat chu an man ta tih an puang.
Kum 63 mi, Christian Emmanuel Sanon hi Haitian a ni a, June thla tir khan an ramah hian private jet hmangin, politics-a tum nei sa rânin a lut tih an sawi.
Tar lan tawh angin kum 53 mi, Moïse-a hi July 7 khan a chenna inah ram dang mi, that tura rawih mi 28-in luhchilhin an that tih police hian an lo puang tawh.
A nupui pawh na taka inhliamin inenkawl turin United States-ah la a ni.
Martine Moïse-i hian beih an tawh dan chu a hma fe atanga ruahman lawk a nih thu leh a pasal taksaah chuan silaimu a lut zawih zawih tih a sawi.
Beihna an tawh chu a rang em em a, Jovenel-a chuan eng thu mah a sawi hman lo tih a sawi.
President thahnaa a bultumtu ber nia hriat, Sanon-a man a nih thu hi Pathianni zan tlai tawh tak (India-a nimin chawhma) khan an khawpui, Port-au-Prince-ah police-ten an puang.
“Amahin, politics thila tum nei sain private plane-in a lo thlawk lut a ni,” tiin Haiti-a police chief Leon Charles chuan a sawi.
An tum dan chuan President Moïse-a hi man an tum a; mahse, an tum dan an thlak leh ta niin a sawi.
“Police-ten an tum kan dansak avangin hetiang hian an che ta a, a titu bulpui ber oakhat chu Christian Emmanuel Sanon hi a ni,” tiin Charles hian a sawi.
“Mi dang pahnih biakpawh a nei bawk a, anni pawh hi President Jovenel Moïse-a thahnaa a phiartu ber an nih a rinawm,” tiin police chief hian a sawi a. Tute nge mi dang tih erawh a sawi lo thung.