Afghan sorkar chuan United States sipaiten an chhuahsan hnuah Taliban nena remna zawnga an inbiakna a tlawlh zui bawk chuan sipai chakna hmanga India puihna a dil mai thei.
India-a an ram palai chuan Taliban an len zel chuan India puihna hi an la mamawh mai thei tih a hi a sawi a. US anga sipai thawn luh lam erawh a ni dawn lo va, training leh hmanrua vela puihna lam a ni thung ang.
Taliban aiawh leh Afghan sorkar hi remna zawngin an inbe mek a, hetih lai hian an ram atanga US leh a kaihhruai ram dang sipaite an an chhuah mek laiin hel pawl hian ram an zauh mek zel.
Tuna an thlen chinah chuan Doha khawpuia inbiakna hian rah tha a chhuah a rinawm lo ta hle a, chu ai chuan Taliban hian tharum hmanga Afghanistan pum an awp theih mai rinna a lian ta zawk hle niin AFP chuan a tar lang.
“Taliban nena kan indawr meknaah hian hlawhtlinna a awm lo a nih chuan hun a lo kal ang a, India sipaite puihna kan mamawh mai thei a, kum lo kal zel turah hian sipaia inpuihna a awm zel ang,” tiin Farid Mamundzay chuan NDTV hnenah a sawi.