North Korea Supreme leader Kim Jong-un-a farnu chuan United States chu rimchhia pu darh lo turin a vaukhan lawk.
President Joe Biden-a’n thla thar hian Korea policy a puan dawn vang a ni a. Hei bakah hian Kim Yo-jong chuan tuna US leh South Korea-ten indo nunchan an zir mek chungchang chu a sawisel bawk.
South Korea leh US-te hian sipai nunchan an zir apiangin North Korea hian thuchhuah a lo nei ve vat zel a. Tun tumah pawh hian indo nunchan an zir mek bakah US secretary of state leh defence chief-ten Seoul an tlawh tur hriain Kim Yo-jong chuan an ngaihven tih a tihlanna pakhat a ni a, meeting an neihnaa an thutluknain nghawng a neih zui dan tur erawh a puang lo va, a vaukhan ringawt a ni.
US thuneituten Seoul an tlawh dawn hma ni chiahin Yo-jong-i hian thuchhuah hi a siam a. Indo nungchang an zir mek chu an ram run tura an hmalakna a ni tiin North Korea chuan an puh bawk.
US sorkar chuan tun hnaiah North Korea hi vawi tam tak biak a tum thin tawh a. Mahse, chhana vawi khatmah an hmu lo.
White House chuan buaina chhuak zel tur tihnepna tur atana biak tum niin an insawi.