South African lawngchawlhna khawpui, Durban-a mi rethei chenna venga kangmei nasa tak chhuakah in 100 chuang a kang chhia.
Chenna pangngai ang tak atana duan ni lem lo, Kennedy Road an tih maia Pathianni tuka chhiatna thlengah hian mi pakhat a thi tih chian a ni tawh a, ruang dang pawh an hmuh belh ngei an inring.
Video thehdarhah chuan in sakna atana hman rangva kang bang ut rem ruam tam tak hmuh tur a awm a, a hmun a kang chhe hneh hle tih a lang.
A mi chengten an thil kang lo leh bungruate dap khawmin an phu suau suau bawk.
Kangmei chhuah chhan hi hriat mai a la ni lo va; mahse, thil thleng hmutu thenkhat chuan mi pahnih zu in an inhnial atanga intan niin an sawi.
South African Red Cross thupuangtu chuan he chhiatna thlengah hian chenna atana hman (shack) 1,000 chuang a kan chhiat a rinawm thu leh mi 3,000 velin chenna tur an neih loh phah dawn niin a sawi.
Siyabonga Hlatshwayo chuan eNCA news site hnenah Red Cross-in ei tur, mutbu leh kawmawl an sem a, vantlang hnenah tanpuina pe turin an ngensak bawk tih a sawi.