Manchester United chuan Inter Milan goalkeeper Andre Onana chu Pound maktaduai 50 vel bawrin an lalut fel thuei dawn.
Kum 27 mi hian United-ah hian David de Gea hmunruak luahin number one goalkeeper a ni ang.
Pathianni khan United leh Onana aiawhte hian indawrna neiin kum nga contract ziak turin an inrem a, kum khat ziah belh theihna a awm dawn.
Club pahnih inkarah inremna tihfel a la ni lova, a man tur zatah inrem tawh mahse an inpek dan tur chungchang tihfel a la ngai niin an sawi.
United hi tunkarah United States a pre-season inbuatsaihna neih turin an zinchhuak dawn a, hetah hian Onana hi hruai tel nghal hman an tum.
Onana hi manager Erik ten Hag hnuaiah vawi 150 dawn Ajax-ah inkhel tawh a ni a. Dutch coach in a hrechiang a, thawhpui leh a duh a ni.
Maguire dinhmun?
Manchester United hian captain thar an nei dawn a, Harry Maguire captain nihna chu Thawhtanni khan an hlihsak.
Magure hi kum 2020 January khan club captain a ruat a ni a. Tunhnaiah a inkhelh tam loh avangin captain thar an awm dawn.
“Manager nen inbiakna kan neih hnuah captain a thlak dawn tih min hrilh a. A chhante min hrilhfiah a, keima lamah chuan thil na tak nimahsela he kawr ha chung hian ka theihtawp ka chhuah zel reng dawn.” tiin Maguire chuan a sawi.
Kum 30 mi hian tun season liamta khan Premier League match 8 chiah inkhel bul a tan a. London club thenkhat West Ham United leh Chelsea ten an ngaihven nia sawi thawm a awm bawk.
Rashford contract thar?
Hun engemaw chen an indawr hnuah United star player Marcus Rashford chuan kum nga contract thar a ziak dawn a, inremna an tifel niin thu a thang bawk.
England forward hian thuphunga inremna club nen an neihna a rei tawh a, mahse club in a puangzar thuai dawn niin a lang.
Kum 25 mi Rashford hi United in tunhnaia player chelh ngheh an tum zingah telin Luke Shaw leh Diogo Dalot ten contract thar an lo ziak tawh bawk.
Hetihlai hian United hian tlarhma a khel tur striker an la melh chhunzawm a, Atalanta striker Rasmus Hojland chu ngawrh zawkin an um dawn nia ngaih a ni.