Eptu party tangrualten I.N.D.I.A an din mek lai hian BJP pawhin an thawhpui party-te nen Delhi-ah an thukhawm a, party 38 zet an tel.
Thawhlehni tlaia an thutkhawm tanah hian Prime Minister Narendra Modi chuan an thawhpui party aiawha telte dawngsawngin chibai a buk.
“Vawiin hian Delhi-ah India ram puma NDA-a tangrualte an inhmukhawm thei tur hi a lawmawm a. Kan thawhhona hi hunin a fiah a, ram thanna tur leh a hniam lai bikte mamawh petu a ni,” tiin a hmain Twitter-ah a tar lang bawk.
Party 38 zinga a tam ber hi party tenau deuh leh MP pawh nei lote an ni hlawm a; mahse, nakum inthlanpui lo awm turah prime minister kaihhruaina hnuaia seat chan beisei niin an tan hun a inhawn beiseitute an ni hlawm.
BJP hian ruahmanna fel tak an duang nia ngaih a ni a. Tunah hian hmar lam state zelah an chak a; hei vang hian chhim, khawthlang leh hmarchhak lama huang zauh an tum nia ngaih a ni.
State lian leh pawimawh thenkhat, Uttar Pradesh leh Bihar angah chuan hnuhma tha nei tawhin hnam hnufual leh scheduled caste leh tribe zingah an tla na viau tawh.
Bihar-ah thung chuan Nitish Kumar-a’n kalsanin an thawhpui awm chhun chu Lok Janshakti Party deuh chiah a ni a. Tunah hian BJP hian Chirag Paswan-a chu pawh luha Bihar-a vote awm 6% lai neitu Paswan hnamho chan an tum a ni.
Bihar atang vek hian party pathum – Upendra Singh Kushwaha-a kaihhruai Rashtriya Lok Samta Party, Mukesh Sahani-a kaihhruai Vikassheel Insaan Party leh Jitin Ram Manjhi kaihhruai Hindustani Awam Morcha te pawhin NDA hi an zawm zui rin a ni.
Chhimah BJP hian lemchan thiam, Pawan Kalyan-a kaihhruai Jan Sena leh Kerala Congress phel, Kerala Congress (Thomas) chu pawh luh an tum bawk.
Tun tum hi nakum inthlan lo awm tura NDA-in thutkhawm a koh hmasak ber a ni a, a hmain eptute inko khawm chu tul lo an tih thu an lo sawi tawh.