Bollywood star Akshay Kumar-a’n Manipur-a tribal hmeichhe pahnih, kawngpuia mipuiin mawi lo tak leh an zahawmna tibawrbanga an hnuh kual lai video darh nasa tak chu na takin a dem.
Twitter kaltlangin, “Ka khur zawih zawih th ei a, Manipur-a hmeichhe laka tharum thawhna hi hmuh hrehawm tak a ni. Heti ang thil tenawm leh rapthlak tak hi tunhnu a thlen leh tawh lohna turin inhnamhnawihte hian hremna na tak hmu ngei rawh se,” a ti.
Video darh nasa takah hmeichhe pahnih chu saruakin kawngpuia kalpui niin, mipui hmuh lai ngeiin mipat hmeichhiatna lam hawia tihnawmnah an ni.
Manipur-a chi leh chi inkara buaina leh tharum thawhna thleng chungchanga rampum huap milar filmstar tawngchhuah hmasa ber hian ngaihven a hlawh. Tun thleng hian Askhay Kumar tih loh filmstar lar dangte hian ngawih an chuh vek a, thla hnih liam atanga intan tawha buaina namai lo takah tumah an tawngchhuak lo.
He video hmuh hrehawm tak hi July 19 nilaini khan nasa takin a darh a, media report danin, tharum thawhna a chhuah tirh lam thla hnih kaltaa thil thleng a ni.
Thil thlenna hmun hi Meitei tamna hmun Thoubal district a ni a, tunah hian Thoubal police station-ah thubuai hi ziahluh a ni tawh.