United States-a Oregon state chhunga ram kang mek chuan ram acre 300,000 chuanga zau a kang chhe tawh a, mi sang tel hmun himah an insuan chhuah phah.
Oregon state chanchina ram kang lian ber pakhat, Bootleg Fire an tih hi kangthelhtu mi 2,000 chuangin thunun tumin an bei mek.
July 6 atanga kang tan kha niin Los Angeles khawpui aia zau a kang tawh.
US-ah hian state 13-ah ram kang buaipuiawm tak tak 80 chuang a awm mek a. Hengte hi khaw lum lutuk leh thli chak tak tlehin a thlente an ni hlawm.
Sik leh sa inthlak nasa lutuk chuan khua a tilum zual thei a, khaw ro tak thlenin ram kang pawh a tam phah thei.
Khawvel pum hi industrial era intan lai vel ai khan 1.2°C velin a lum tawh zawk a. Sorkar hrang hrangte chu khua tilum thei boruak chhia tichhuak tlem tura kar reng an ni.
Oregon-a Bootleg Fire hi a bul hnaia Bootleg Spring hmingchawia sawi a ni a, a bul hnaia cheng mi 2,000 chuang chuan an chenna in an chhuahsan phah tawh a. Chenna in 160 vel a chhe tawh.
Thuneitute chuan a kang zinga hmun lia thena hmun khat vel chu an thunun thei tawh tih an sawi.
“Nileng zankhuain kangmei thelh hian kan thawk,” tiin fire incident commander Joe Hessel chuan Thawhtanni khan a sawi.
“Tun tum kangmei hi a lian tham a, kan hmaah hian eng ang fakauva hautak nge lo chhuak dawn kan sawi thei lo,” a ti.
Bly khuaa cheng, an in meiin a tihchhiat vek, Sayyid Bey chuan a him chin atanga an in a kang lai an thlir thu a sawi a, “A sen phut a, Sikeisena awm ang mai kan ni,” a ti.
Bootleg Fire hi Portland chhimthlang lam km 480 vela hla a ni a, a kan zel chuan thil tam zawk tichhe thei dinhmunah a ding mek.
Klamath Falls leh Redmond pawh telin, khawpui hrang hrang atanga insasengte tan evacuation centre pahnih siam a ni.
Pathianni khan Operations Section Chief John Flannigan chuan khaw lum leh ro lutuk chuan leiah satna a thlen nasa a, hei hian boruak chu thunun theih lohvin a awmtir niin a sawi.
Khaw lum lam hi 10° leh 15°F inkar velin a hun pangngaia mi aiin a lum zawk a. Rei tak ruah a sur lo tawh a, hei hian chhiatna dang pawh a thlen zel an ring hle.