Singapore-a sikul naupang kum 16 mi chu a sikul kaipui thata puh niin man a ni a, he thil thleng hian an ram pumah mak tih a hlawh hle.
Police officer-te chuan Thawhtanni khan high school bual inah mipa naupang kum 13 ruang an chhar a. A bulah hrei an chhar bawk.
An chhui tawhna chinah chuan heng mipa naupangte hi a hranpaa inhre sa an ni lo.
Singapre-ah hian sikula tharum thawhna thleng hi a tam lo hle a, khawvel pumah pawh pawikhawihna thlen tlemna ram a ni.
Tun tum thil thleng hi hriat hlawh tak, River Valley High School-a thleng niin inkharkhip hnuah an kal leh deuh chiah a. Zirlaite hi an classroom theuhvah awmtirin tu emawin hrei a siam tih an nu leh thiante hnenah an thawn tih chanchinbute chuan an tar lang.
A titu nia rin ber hi man a nih hnuah zirlaite pawh hi chhuahtir an ni.
Mipa naupang kum 16 mi hi nimin khan court-ah hruai a ni a, an ram danah chuan thi tura hrem a ni thei dawn a. Hetih rual hian kum 18 la tling lo, naupang a la nih miau avangin dam chhunga tang tura hrem a nih pawh a rinawm.
Prosecutor-te chuan judge hnenah a rilru lam enkawl a nih theih nan inenkawlna hmuna dah phalsak turin a ngen.
An sawi dan chuan kum 2019 khan amah inthah a tum avangin mental health institution-ah dah a lo ni tawh.
Singapore-a Law & Home Affairs Minister K Shanmugam chuan a titua puh hian hrei hi online-a a lei niin a sawi.
“A tuartu nu leh pa kan tawrhpui a, an tawrhna hi sawi fiah thiam rual a ni lo,” a ti.
Singapore ram danah kum 18 an la tlin loh ve ve avangin thi leh a titua puh hi an hming tar lan a rem lo.
Education Minister Chan Chun Sing chuan police nen sikula tualthihna thleng chhuinaah an inbepawp reng a, an thawkho zel tih a sawi a, zirlaite pawh thlamuang taka awm turin a chah.
He thil thleng chungchang hi online lamah Singaporean-ten an sawi zui nasa hle a. Sikula zirlaite himna leh an rilru hriselna lam dinhmun te pawh an sawi nasa a, tualthattua puhin engtin nge hrei chu a lei theih tihte chu an zawhna a ni.