Chi leh chi inkara tharum thawhna thlenna hmun, India hmarchhaka Manipur-a hmeichhe pahnih, saruaka khawlaia mipuiin an kalpui lai video darh chuan India a luah hneh hle.
Police chuan he thilah hian pawngsual rawn thubuai an an ziah luh thu leh mipa pakhat man a nih tawh thu an sawi a, mi dang pawh man thuai a nih tur thu an sawi.
Ningani khan Delhi-a parliament thutkhawmah pawh sawi chhuah niin MP thenkhat chuan he thil hi sawiho ngei an duh thu an aupui.
Prime Minister Narendra Modi pawhin he thil thleng hian ‘India a tizak’ tih a sawi a, ‘a titute chu tumah ziah an ni lo vang’ tih a sawi.
“Ram leh dan hian a tih tur dik tak a ti ang. Manipur fanute laka thil thleng hi ngaihdam a ni ngai lo vang,” a ti a. Hei hi thla hnih chuang Manipur-a buaina a chhuah tawh hnua aw-ka a neih hmasak ber a ni.
Chief Justice of India DY Chandrachud pawhin he thil thleng hi a rawng tak zet tih a sawi a, Supreme Court chu ‘video hian a tibuai hle’ niin a sawi a. Sorkar hnenah pawh a titu nia rinhlelhte laka hma a lak dan hriattir turin a ti a, chief justice hian ‘hmalakna a awm lo a nih chuan keini kan che chhuak ang’ a ti bawk.
Myanmar nena an inrina lai bawra awm, Manipur-a chi leh chi inkara buaina hian thla hnih chuang a awh tawh.
A mi cheng tam ber, Meitei leh Kuki tribal inkarah tharum thawhna thleng hian chhiatna a thlen nasa tawh hle a. Mi 130 vel thi tawhin mi 60,000 chuang mahni in leh lo tlansana hmun him dang pan an awm tawh.
Video-a darha hmeichhiate hi Kuki an ni a, Meitei mipaten hetiang hian an chungah an ti a ni.
Police chuan he video-a lang hi May 4-a thleng kha a nih thu leh Ningania social media-a a darh hnuah ram pum titi a ni chauh thung a. Sorkar laipui chuan social media company zawng zawng chu he video delete vel tur hian a ti.
Video hi Nilaini khan nasa takin social media-ah thehdarh a ni a. A lan dan chuan mipa rualin an hnuk a, an pawt a, an nam a, phulah an nawr lut.
Indigenous Tribal Leaders’ Forum (ITLF) chuan he thil hi Kangpokpi district-a thingtlang khaw pakhata Kuki-Zo tribal hmeichhe chunga thleng niin an sawi a. Pawngsual rawn an ni ngei niin an sawi bawk.
“Pawngsual rawn hi khua an hala mipa pahnih, pa valai leh rawlthar sawisak hlum an nih hnua thleng a ni,” tiin ITLF chuan an sawi.
Police hian May 4-a thleng niin Thoubal district-ah mi ruk bo, pawngsual rawn leh tualthah thubuai an ziak lut tih an sawi.
Politician-te pawhin party nihna sawi lovin he thil thleng an dem thu an sawi hlawm.
Union Minister Smriti Irani-i chuan he thil thleng hi ‘mihring tih atana awm lo lutuk’ niin a sawi.
Eptu party hruaitu eng emaw zat chuan rorel lai, BJP sorkar chu hmarchhak state-a tharum thawhna thleng an hmet mit theih loh avangin an dem a, an sawisel bawk.
Congress party hruaitu, Priyanka Gandhi Vadhra chuan ‘Manipur-a hmeichhiate chunga mipat hmeichhiatna lam hawia thil thleng chu a na tak zet’ tih a sawi.
Delhi Chief Minister Arvind Kejriwal pawhin a rilru a nat thu a sawi a. “Hetiang nunrawng lutuk thil hi India khawtlangah ngaihzam theih a ni ngai lo,” a ti.