Aizawl : ZPM PAC meeting chuan Manipur-a Zohnahthlak hmeichhe pahnih chunga thil thleng an dem thu an sawi.
Ningania an pisa-a ZPM PAC thukhawm chuan, “Manipur state-ah politics buaina nasa tak a chhuak a, nunna tam takin a tuar a, biak in leh chenna in tam tak hal a ni tawh a. Hetih laiin, Central BJP sorkar PM Modi-a kaihhruai a ngawi tlat hi ZPM party chuan a dem takzet a ni. A bik takin kan unau, kan farnu pahnihte ruaka hruai kual a sawisa a, tinnawmnah lai video thla hnih chuang hnua a rawn lang chhuak hi a thinrim thlak kan ti tak zet a. Vawiin thlenga thil tisualtu te hrem an la ni lo hi Manipur CM N Biren Singh a sorkar rintlak lohzia a tilang chiang hlein kan hria a. Kan dem tak zet a ni,” an ti.
ZPM PAC chuan, inthlan hun thla nga lai a la awm lai leh, ECI-in inthlan a puan hmaa candidate an rem fel thei chu lawmawm an tih thu leh, lungrual tak leh chak taka thawhho an tum thu te, an party candidate-ten eirukna laka fihlim an intiam a, thupui bera an neih thei chu an chhuan thu leh, ZPM Unit, Zonu leh thalaite’n inhlawhfaa sum an tuak a, candidate te senso phuhruk nan an hlan thin chu politics khelh dan thianghlim, kalphung thar dik tak a lo lang taah an ngaih thu an sawi bawk.