Aizawl : Congress party chuan July 19, 2023-a ZPM Leader Lalduhoma’n Aizawl Press Club-ah ZPM Candidate tur Congress in cheng nuai 100 in an thlem nia a sawi hi Guwahati-a zin chungchanga a dawt sawi Mizoram mipui te rilru lak pen leh phat mar tuma tal buaiin dawt dang a sawi lehna mai a ni, an ti.
Nimina thuchhuah an siamah MPCC chuan ZPM leader chu thil chiang fak hre lo a nih thu sawiin, “Assembly House ngeiah pawh a dawt sawi vanga ngaihdam dil ngai hial kha a ni,” tia tar langin, Lalduhoma hian cheng nuai 100 chungchang a hriat pawh hi Assembly Speaker Lalrinliana, USA zinin MNF sorkara cheng nuai 100 chungchang ziah bo awm a sawi a hriat pawlh leh tawh em ni, tih hi an zawhna a nih thu an tar lang.
MPCC-in an tar lan danin, ZALEN chanchinbuin July 18, 2023 (Thawhlehni)-a BJP Minority Morcha National Secretary Delson Notlia a kawmnaah, BJP Minority Morcha National Secretary Delson Notlia chuan Airport-ah Lalduhoma chu a hmu ngei tih ZALEN a hrilh a, ZPM leader hi hmaichhana tum khat an inbiak tawh bak inbiakna an la neih loh thu a sawi a. ZPM Leader Lalduhoma erawh chuan ZPM chhung inkhawmah Delson hi vawi khatmah a la hmuh loh thu a sawi a, WhatsApp-ah erawh an inbiak thu a sawi thung. Delson erawhin ZPM leader hi hmaichhana tum khat an inbiak tawh thu a sawi ve thung a. ZPM chhungkaw pa berin chhung inkhawmah Mizoram mipui te mai ni lo, ama party pui te hmaah ngei pawh dawt a sawi duh zel hian chhungkaw pa ber atana mi rintlak a nih lohzia Lalduhoma hian a intifiah chiang hle a ni, an ti.
MNF sorkar hi NDA leh NEDA a an thawhpui BJP hian sorkar leh tura an rin loh avangin an sum leh pai tha chakna hmanga Congress party do thei tur tualto party dang an zawng tih chu Mizoram mipui rindan a ni tih tar langin MPCC chuan, “He hun remchang hi lo lak tumin ZPM chhunga mi thenkhat ten Kristiante nekcheptu BJP a ruka an dawr chungchangah ZPM chhungkuaah nasa taka inpuhmawhna a awm hial a ni,” an ti bawk.