Aizawl : Mizoram Lok Sabha MP C Lalrosanga’n parliament monsoon session lo awm turah Manipur tualchhung buaina leh Uniform Civil Code (UCC) chungchang sawi ho ngei a duh thu thlen.
Nilaini-a neih tan parliament monsoon session inbuatsaihna All Party leaders meeting, Parliament Library building committee room-a neihah Mizoram MP pahnih, C Lalrosanga leh K Vanlalvena te an tel a. He huna MNF party aiawha thusawitu C Lalrosanga chuan, Manipur buaina chungchang chu parliament session laiin sawi hona hun siam ngei a tul thu te, mipui tam takte nunna leh bungruate a luan ral tawh avangin a rang thei ang bera buaina tih tawp a tul thu te, thenawma awm vanga raltlan tam tak Mizoramah an luh thu te, sorkar, kohhran, NGO angte leh mi malin theih tawpa an puih thin thute leh sorkar laipuiin chhawmdawlna Mizoram sorkar kuta a pek ngei a tul thute a sawi a ni.
C Lalrosanga hian tun hnaiah Prime Minister-in Uniform Civil Code chungchang a sawichhuah thar avangin Parliament session-ah bill anga a lut lo anih pawhin sawihona hun siam a, an duh loh chhante chiang taka sawi fiahna hun siam law law tha a tih thute a sawi bawk.
Union Defence Minister Rajnat Singh kaihhruai thutkhawmah hian tun tum Parliament session-ah hian bill chi hrang hrang 31 sawiho tura chhawp chhuahte chu thlirlawkna neih a ni a. He’ng bill zingah Kristiante leh tribal te’n an ngaimawh UCC Bill erawh chhawp chhuah zingah a tel rih lo thung.