Aizawl: MNF chuan Chief Minister Zoramthanga kaihhruaina sorkar hnuaiah infiamna kawngah Mizoramin nasa takin hma a sawn tih sawiin, Sports Minister Robert Romawia Royte hi a chet that em avangin eptu tan pawh thik tham a nih thu an sawi.
Ningani khan MNF Media & Publicity department-in Aizawl Press Club-ah thuthar thehdarhtute an kawm a. An General Secretary VL Krosshnehzova chuan Mizoram budget pawnlam atangin sports department sum thawh chhuah pawh a tam hle tih sawiin Mizoram budget-ah sports department-in Rs nuai 2,600 vel annual plan sum a neih laiin, Rs nuai 45,000 chuang a thawk chhuak a. GST leh labour cess atangin sum tam tak sorkarah a la chhung lut bawk tih a sawi.
VL Krosshnehzova chuan tun kum li leh a chanve chhungin infiamna ruhrel din nan SYS Deptt-in hmasawnna hna tam tak a thawh rual hian GST leh labour cess tam tak thawkchhuakin sorkar sum bawma sum chhung luttu lian tak a tling tih sawiin, chhuanawm a tih thu a sawi a. DPRs tam tak siam a nih avangin leh nachang hre taka a changtu minister leh deptt ten an umzui avangin mipui mak tih khawpin infiamna ruhrel ropui tak tak a nei thei tih a sawi.
MNF sorkar atanga kum khat ral hmain an mainifesto-a tel ‘Mizoram State Sports Policy 2019’ chu tihlawhtlingin, Mizoramin a la neih ngaih loh chu hman nghal a. India rama a vawi khat nan Mizoram sorkarin infiamna chu industry nihna a pek avangin mi mal company leh sumdawngte tan pawh infiamna hmasawnna atan kawng zau tak a inhawng ta tih a sawi bawk.
MNF media & publicity dept General Secretary chuan Mizoram Sport Policy-in a sawi angin Sports Complex pathum Lunglei-ah Rs 4919.31 lakh, Lawngtlai Rs 5019.43 lakh leh Mamit Rs 4496.19 lakh tesak mek a nih thu a sawi, “Facilities tha tak tak a awm avangin Mizoram sports hmelhmang tidanglam dawrh tura ngaih a ni. Mizoram mamawh em em Athletic track, Sports Hostel, Futsal, Volleyball, Basketball, Tennis Courts, Halls etc a awm ang,” a ti.
MNF sorkar Zoramthanga kaihhruai in beih tawk mek zel mah se, hripui lengin a tibuai chung pawhin infiamna kawngah Mizoramin nasa takin hma a sawn tih sawiin, “Kan sports minister hi a chet that em avangin eptu tan chuan thik tham niin, thu belhchian dawl lo leh rinthu nen an bei chiam chiam mai thin a. Thudik erawh alo lang chhuak leh thin a, Assembly House chhungah ngei pawh Pu Lalduhoma, ZPM MLA chuan Zoram mipui hriatah ngaihdam hial a dil a ngaih phah a ni,” VL Krosshnehzova chuan a ti bawk.