Mizoram chief Minister Zoramthanga chuan Manipur-a Zohnahthlak hmeichhiate chunga nunrawnna lantirna video darh chuan a thin a thawng hle tih sawiin, he thil thleng chungchangah Prime Minister Narendra Modi leh Manipur Chief Minister N Biren Singh te chu pawikhawihtu man chhuaka dan hmaa rorelsak thuai a phut.
Nimina a Instagram official account-ah Zoramthanga hian Manipura nunrawng taka tharum thawhna chuan thenawm ramte chauh ni lo vin, ram pum a nghawng chhuak tih a tar lang a. Tun hnaia hmeichhiate chunga nunrawnna lantirna video darh chhuak chuan a ti thinthawngin a deng na hle tih tar langin, “Video-a kan hmuh zahmawh thila inbeihna hi zahngaihna tello nunrawng taka chetna uchuak, zahthlak tawpkhawk leh mihring chunga nunrawnna lantirna demawm tawp a ni,” a ti.
Zoramthanga hian Manipur buaina chinfel leh tihtawp hlen dan kawng ngaihtuah hi a tul tak zet tawh a, a tihtawp dan ngaihtuah theitu tur pawh sorkar laipui chauh a ni tih a tar lang.
“Manipur buainaah hian mi tam takin nunna an chan tawh a, thisen tam tak a luang ral tawh a, hlim tuar leh sahimna zawnga hmun dang pan mi tam tak an awm belh zel bawk a, chung zingah chuan ka chipui Zohnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo,” a ti bawk.