Aizawl: ZPM Media, IT & Publicity department chuan nimin khan cyber crime hotute an kawm a. Tun hnaiah social media-a ZPM tihmualphona tura lemchanga thu post leh group siamte chhuichhuaka an chungah action la turin an ngen.
An thuchhuahah ZPM chuan tun hnaia social media-ah Lalbiaktluanga Juda intiin ZORAM POLITICS GROUP II-ah ZPM thu post niawm takin, ‘Republic Veng ho khan lo hre rawh u, ZPM hi min ngam chuang lo vang. Eng ang paw’n emergency meeting pawh lo nei mah ula, nangni veng mipui aiin ZPM hi kan tam fe zawk,’ tih a post niin an tar lang.
Hemi chungchangah ZPM hruaitute chuan, “Veng feeling chawkchhuak thei zawnga thu a post chungchang hi kan ngaih thutak hle a, he thu post-tu, Lalbiaktluanga Juda hi kan hriat ngai a nih loh thu leh a thu post tawh thin dan enin ZPM supporter a ni lo tih a lan chian avangin, he a thil tih hi ZPM tihmualpho tumna ni ngeiah kan ngai,” tiin, tun hnuah hetiang lemchanna thil hi a thlen tawh lohna turin cyber crime hotute hnenah lo enzuisaka a tul anga action laksak turin an ngen.
Hei bakah, Zoram Parteii intiin ZPM Working President K Sapdanga hminga K SAPDANGA SUPPORT GROUP tih a lo siam chungchangah pawh sawiin, “Zoram Parteii inti thu post tawh thin dan enin, ZPM supporter a ni lo tih a lang chiang bawk a, he a group siam pawh hi ZPM Working President Pu K Sapdanga tihmualpho tumna ni ngeia kan ngai,” tiin, cyber crime hotute hnenah lo chhuichhuak a, a tul anga action la turin an ngen bawk a ni.