Manipur buaina chungchanga BJP chet dan an duh khawp loh avanga BJP Office kawta pungkhawm AAP member-te chu BJP worker-ten nawr kir an tum a, innawr buaina thleng mah se buaina lian erawh a chhuak lo.
AAP Mizoram member te chu nimin chawhma dar 10:30 bawr vel khan Upper Republic-a BJP office kawtah an pungkhawm a, Manipur buaina chungchanga BJP sorkar hmalakna an duh khawp lohna in ziahna hrang hrangte an keng a, BJP worker te chuan an office kawta pungkhawm te chu nawr kir an tum a, party pahnih worker te hi hun rei vak lo chhung chu an in nawr buai a, Police te an in rawlh vat avangin buaina lian tham erawh a chhuak lo thung a. Hemi hnu hian AAP member te chu BJP office kawm chhak zawlah hun engemaw chen an awmkhawn leh hnuah dar 11:30 bawr vel khan an trin darh ta a ni.
Hemi chungchanga AAP in thuchhuah an siamah chuan, buaina siam tuma pungkhawm an nih loh thute, sitting demonstration neih an tum chu BJP te chuan tharum hmangin an lo chhang let ta tih sawiin, hetiang ang tharum thawhna hi Mizoramah tal chuan ching tawh lo turin BJP an ngen tih an sawi a, BJP sorkarna hnuaiah buaina a tamin, mipuiin an tuar nasa hle tih an sawi bawk.
Hetihlai hian BJP Mizoram pradesh chuan an office kawta AAP Mizoram te an punkhawm chungchangah hian Aizawl SP hnenah FIR an theh lut a, an lehkha thehluhah chuan AAP Mizoram inti mi engemaw zat chu Vantlang hmuna punkhawm phalna Deputy Commissioner Aizawl hnen atanga la lo in an pungkhawm tihte, phalna nei loin aurinna an hmang tihte, upper republic to raj bhavan kal kawng hun rei tak an dang chat a, Govenor security atan pawh pawi thleng thei hiala an ngaih thute, an punkhawm avang hian BJP-in political session an neih thin pawh a tih khaihlak phah tih an tarlang a, hetianga dan pawisa lova chetna nasa tak thleng hi dan anga an chunga action la turin an ngen tih an tarlang a ni.