Mizoram Pradesh Congress Committee (MPCC)-in nimin khan an pisaa political session an nei a, he huna thusawitu, an President Lalsawta chuan October thla atangin MNF chim runpui a thleng dawn niin a sawi.
Lalsawta chuan tuna India ram roreltu BJP leh MNF hian kawng tha te, ram enkawl dan tur tha te, ei leh bar zawnna kawnga hmasawnna tur te an sawi ngai lo tih sawiin, “Pawisa chiah an sawi thin,” a ti a, Mizoramah pawh MADC leh CADC-ah te chuan pawisa chaknain mipui thlan rorelna an namthlu zel tih a sawi.
Manipur-ah nasa takin Zohnahthlak unauten BJP rorelna an tuar a, BJP nih te, BJP fak te a tiha tih ngai loh kha hman ni lawk a ni tiin, “Tunah chuan BJP sum it vangin mi pangngai tak takte pawhin BJP fakna an chhakchhuak ngam ta hi thil rapthlak a ni,” Lalsawta’n a ti.
Congress president chuan kumin MLA inthlanpui lo awm turah MNF-in SEDP an vauchher tih sawiin, “Hmangaihna tel loa ngaihzawng neih ang a ni. Candidate chang lovin MNF MLA ni lai tam tak chhawkin an awm dawn a, October thla atangin MNF chim runpui a thleng dawn,” a ti bawk.
ZPM party a sawina nia ngaih theih turin Lalsawta chuan, “MNF ang maiin party pakhat chu sorkar tha siam tum si lovin sorkar hrim hrim tumin, Mizote pawikhawihtu BJP pawisa hman tangkai theih beiseiin thimhnuaiah a rukin an vak vel ruai a. An lungmuanna chu BJP pawisa a ni a, pawisa pawh an ngah dawn,” tiin, heng mite hi Mizo hnam leh sakhua bakah ram mipui dinhmun him loa dah a, Mizoram mipuite leh chhuan lo kal leh turte pawi an sawi tih a sawi.
AIPC President Dr. Henry Zodinliana kaihhruai political session-ah hian MPCC social media dept-a Consultant Vanneihthanga Vanchhawng pawhin thu a sawi.