Aizawl : Mizo National Youth Front (MNYF) chuan thuchhuah siamin, July 20, 2023 chawhnu lam khan Zoram People Movement (ZPM) office kawtah ZPM MLA Vanlalhlana car driver in Republic veng tlangval kutthlakin a nghaisa niin an tar lang.
An thuchhuahah, Republic veng chhunga tharum thawhna thleng chungchang an hriat veleh bawhzui nghalin, pawikhawihtu hi ZPM MLA Vanlalhlana nau leh driver ni bawk, Samuel Lalngaihawma a ni tih pawh a finfiah nghal niin an tar lang.
MNYF in an tar lan danin, Zirtawpni khan MNF thalai hruaitute chuan Aizawl Police Station-ah kala an zawhfiahnaah, Samuel Lalngaihawma hi Ningani zan dar 1 velah Mizoram Police ten man mah se, nimin zing lamah Aizawl PS atanga lakchhuah leh nghal thu an va hmu a ni.
MNF Thalai chuan, “ZPM MLA Vanlalhlana nauin khaw eng pawh zah lo a, mipui vantlang tamna hmuna tharum a thawhna kaihhnawihah Republic Veng Local Council Chairman in July 20, 2023 zan dar 12-ah Aizawl Police Station-ah FIR a theh lut a, hemi zan vek hian Mizoram police te chuan pawikhawihtu hi man nghalin thubuai chi hrang hrang pathum – mi kawngkal lai tihbuaina thubuai IPC Section 341, midang tihnat tumna thubuai IPC Section 352 bakah, midang laka hliam thlenna thubuai IPC Section 323 te ziah luh a ni a, pawikhawihtu hi dan ang a hremna pe ngei turin thuneitute kan ngen a ni,” tiin, Republic veng mipui leh khawtlang hruaitu kiangah MNYF Headquarters chu a ding reng dawn tih an tar lang bawk.