Premier League kaithar Burnley chuan season tha hman tumin inbuatsaihna an kalpui a. Goalkeeper James Trafford leh winger Nathan Redmond an lalut.
Manchester City atangin goalkeeper Trafford chu Pound maktaduai 19 vel bawrin an lei.
City hian 20 per cent sell on clause an nei a, Burnley hian an hralh leh a nih chuan a man atangin chan an nei ve dawn. Hei bakah hian lei letleh theihna turin inremna an nei a, Burnley hian a man hi Pound maktaduai 15 an pe phawt a, a bak maktaduai 4 chu a khelhdan a zirin an pe leh ang.
Kum 20 mi Trafford hi Premier League-ah la inlan miah lo nimahsela season hnuhnung pahnih chhung League One club Accrington leh Bolton Wanderers tan a khel a, hetah hian a chetthat avangin Burnley hian an ngaihven.
Burnley chanchin a player manto ber niin kum 2017 leh 2018 a Chris Wood leh Ben Gibson te Pound maktaduai 17 a an leina a khum.
Tun nipuiah Burnley in player langsar an lakluh pahnihna niin Switzerland forward Zeki Amdouni chu Basel atangin an lalut tawh.
Burnley hian winger Nathan Redmond chu kum hnih chhung atan free transfer in an lalut ve bawk.
Kum 29 mi hian season liamta kha Turkish club Besiktas hnenah a hmang a, Turkish Super Lig-ah goal nga khungin assist vawi nga a nei.
“Premier League a khelh leh duhna hi ka nei a, Burnley thil tum hi ka tel ve duhna tak a ni.” tiin a sawi.