Spain in FIFA Women’s World Cup-ah duhthusam in bul an tan a. Costa Rica lakah hneh taka inkhel thunun in 3-0 in hnehna an chang.
Zirtawpni a Wellington Regional Stadium a inkhelah Spain hian Valeria del Campo own goal hmangin minute 21-naah hma an hruai a. Minute hnih hnuah star player Aitana Bonmati chuan an goal hnihna khungin minute 27-naah Esther Gonzalez chuan striker Jennifer Hermoso ball tauh per atang goal thumna a khung.
Hermoso hian an goal li na khung theihna remchang nei bawk mahse Daniela Solera chuan a penalty pet a save sak a. Costa Rica goalkeeper hi che tha in Spain goal khung tur vawi engemaw zat a dansak.
Spain hian goal-ah vawi 46 lai ‘shot’ an nei a, Olga Carmona chuan goal bar a pet per bawk.
Spain hi World Cup inbuatsaihna boruakah Spanish Football Federation nen an buai a, hmeichhe team hian lungawi lohna neiin an player 15 laiin manager Jorge Vilda chu a ban loh chuan ram tana khelh loh an vau.
RFEF hi Vilda lamah tangin player 15 zingah World Cup khel turin player pathum chiah an ko.
Inkhel dangah Switzerland in 2-0 in a vawikhatna atana World Cup khel Philippines an hneh.
Swiss team tan Ramona Bachman chuan halftime dawnah penalty atangin goal hmahruai a khung a. Second half-ah Seraina Piubel chuan an goal hnihna a khung ve leh a ni.
Phillipines tan Katrina Guillou goal khung chu pawm loh a ni thung.