Furpui kal mekah India khawthlang lamah chuan ruah sur nasa avanga lei minah mi 36 vel an thi tawh a, tui lianin a dan mi 1,000 chuang awm bawkin zan pawh awl lovin chhanchhuah hna thawh a ni.
Maharashtra-a Raigad district-ah Ningani khan hmun thumah lian tham tak taka lei a min thu Zirtawpni khan tual chhung thuneitute chuan AFP news agency hnenah an sawi a. Mi sang chuang tui lian vangin an tangkhang mek niin an sawi bawk.
“Mi 35 atanga 40 vel chu lei min hian a dang a, chhanchhuah tuma beih mek a ni,” tiin thuneitu pakhat chuan a sawi.
Raigad District Collector Nidhi Chaudhary chuan tui lian vanga tang thenkhat chu an inchungah leh kawngpuia bus chungah an awm fur thu a sawi.
Chaudhary chuan Zirtawpniah khan ruah tlemin a tla tlem deuh va, tui chim chin pawh kâm hretin chhanchhuah hna thawh pawh a awlsam deuh phah tih a sawi bawk.
Mumbai khawpui chhak lam, Shivaji Nagar vengah pawh Zirtawpni khan ruah sur nasa lutuk avangin in a chim a, mi pahnih thiin pariatin hliam an tuar niin Press Trust of India news agency chuan a tar lang.
PTI hian Ratnagiri district-a tlangramah pawh ruah sur nasa lutukin a dan mi 200 chu Ningani khan chhanchhuah an nih thu a tar lang bawk.
Tuipui kam khua, mi 70,000 vel chenna, Chiplun khaw zahve vel chu tuiin a chim niin a tar lang bawk.
Ratnagiri district thuneitu, BN Patil chuan sipai, coastguard leh National Disaster Response Force te chu pui tura an koh thu a sawi.
Indian Navy chuan tangkhangte chhanchhuah nan an helicopter an tirh thu leh rescue team leh lawngleng an thawn luh bawk thu a sawi.
Kar kal ta tawpah khan Mumbai chhehvelaa lei minah mi 30 chuang an lo thi tawh bawk.
Chhim lam thova Telangana-ah pawh ruah tam tak a sur avangin an khawpui, Hyderabad leh hmun hniam laiah tui a len theih avangin inralrinna dar khawn rik a ni.
Meteorologist-te chuan Hyderabad-ah hian tun thla chhungin ruah mm 300 tawh niin an sawi a, tun hnai kum 10 chhunga July thlaa a sur tam ber a ni tawh.
An state-a tuikhuah lian ber, Osman Sagar pawh kum 10 chhunga a vawi khat nan tui luang liam huk tur ven nan a tui chhuah then a ni.