India rama chhiah lam thuneitute chuan ram chhunga chanchinbu hriat hlawh tak pahnih, sorkar laipuiin coronavirus a hmachhawn dan sawisel fotute pisa chu luhchilhin a dap.
TV channel Bharat Samachar leh chanchinbu, Dainik Bhaskar hian chhiah an pek tur an pe tha lo niin thuneitute chuan an sawi.
A thawk thenkhatte chenna in pawh an dap a, an mobile phone-te pawh an laksak bawk.
Chanchinbumite dikna chanvo humhalhtu leh eptu hruaitu eng emaw zat chuan thuneitute chet dan hi chanchinbu zalenna rah behsakna niin an puh.
Information & Broadcasting Minister Anurag Thakur erawh chuan sorkarin inrawlhna engmah a nei lo niin a sawi.
“Agency-te hian anmahni hna an thawk mai a, an chet danah hian inrawlhna kan nei lo,” a ti.
Hindi-a chanchinbu tihchhuah, Dainik Bhaskar hi India-a ni tin chanchinbu chhiartu ngah ber a ni.
Ram chhunga hripui a len chhung zawng khan Bharat Samachar nen hian sorkarin a hmachhawn dante pho langin, oxygen leh damdawi in khum inchan loh a nasat dan zawng zawng uar takin an chhuah thin.
Ganges luia coronavirus kai vanga thite ni ngeia ngaih ruang paih, a hnua lâng chhuak leh chungchang pawh an tar lang nasa hle.
April thla khan Dainik Bhaskar hian India rama rorel lai, BJP-a Gujarat state president, Jitu Vaghani-a phone number chu an chanchinbuah an lo tar lang tawh.
Tun hnai lehzuala thil thleng, NSO Group-in an siam, Pegasus spyware-in Indian chanchinbumi eng emaw zat phone a bihthlak chungchang pawh an ziak.
An pisate dap a nih chungchangah hian chanchinbu pahnihte hian sorkar chuan an thu chhuah thin avangin a bei let niin an puh.
Dainik Bhaskar national editor Om Gaur chuan, “Thil na tak taka kan ziah thin avangin hetiang hian min rawn ti ta a ni,” tiin Washington Post hnenah a sawi a. “Chanchinbu dangte ang lo takin, miin oxygen leh damdawi in khum an chan loh avanga an thih dan kan ziak a ni,” a ti bawk.