Aizawl: MPCC Treasurer Dr Lalmalsawma Nghaka chuan Congress tih loh party dangte chu BJP thurualpui thei vek an nih thu a sawi.
Inrinni khan Salem I Congress Unit huam chhung atanga an party zawm thar lawm luhna inkhawmah thu sawiin Dr Lalmalsawma Nghaka chuan Mizoramah Congress party tih loh political party dangte chu BJP thurualpui thei an nih vek thu sawiin, “Congress chu BJP nen ngaihdan inang lo, duhdan inang lo kan nih avangin engti kawng mahin kan thurual thei dawn lo,” a ti.
Dr Lalmalsawma Nghaka chuan Mizoram leh India ram dinhmun hi uluk taka ngaihtuah a ngai a, tute lamah nge an tan dawn tih ngaihtuah chian a tul tih a sawi a. Mi tam tak chuan hmasawnna an hmuh theih nan tiin central lamah thawhpui leh zawmte an nei thin a. BJP te double engine growth tia sawia malsawmna dawn boruakin min tiam a; mahse, hima an inhriat laiin an him lohzia Manipur-a thil thleng khan a tar lang chiang tih a sawi.
India chu thuang hnihah inthenin, a lehlamah BJP an awm laiin lehlam chu Congress an ni a, heng thuang hnihah te hian mipuite chu tute lam tang nge an nih an ngaihtuah a, sakhaw zalenna duhtute nge an thlan UCC barh luih tumtute an thlan dawn tih ngaihtuah chian a tul tih a sawi a. UCC chu hmachhakah hman a ni lovang pawh ti mah se, thlamuanna tur a awm lo tih a sawi.
Manipur MLA te nena an inkhawm tumin, MLA an nih tirh khan tun dinhmun an tawng ang tih an rin bik loh thu an sawi nia sawiin MPCC treasurer chuan, “Manipur-a kan unaute dinhmun atangin mi ropui tak takte pawh an ni; mahse, an duhthlan a fuh loh avangin, BJP an thlawp avangin tun dinhmun an thleng a ni,” a ti.
“Kan ram, kan hnam, kan sakhua him nan mawhphurhna kan nei lian hle a, keimahni lo tumahin min sawifiahpui dawn lo,” tia sawiin Dr Lalmalsawma Nghaka chuan Mizorama party dangte hian an thupui hi tawmpui lem lo pawh a ni mai thei, vawiin thlengin BJP an la thawwpui tlat a, BJP sum leh pai hmanga tha tihchak tum an la awm tlat a, tute nge an nih pawh sawifiah a ngai lo, a ti bawk.
Lawm luh inkhawmah hian Lt. Col. ZS Zuala leh Congress hruaitu Lalnunmawia Chuango te pawhin thu an sawi bawk.
MPCC in an tar lan danin, MPCC treasurer hian Congress zawm thar mi 46 a lawm lut a. Zirtawpni zan khan Unit III atangin mi 13 a lawm lut tawh bawk.