Aizawl: ZPM Leader Lalduhoma’n kumin kum tawpa MLA inthlanna neih turah a mala sorkarna an siam theih loh pawhin ‘BJP nen kan thawk ho lo ang’ tia an sawi lawk theih loh thu a sawi.
Tun hnaia ZPM campaign Committee-in Aizawl Press Club-a press Conference an neihah, The Zozam Times-in ‘Sorkarna siam thei awm lo ta ula, BJP in thawhpui dawn lo tih insawi chiang tawh em?’ tih a zawhna chhangin Duhoma chuan, “‘Anni nen hian kan ti tlang ang, anni nen kan ti tlang lo ang,’ tih a sawi lawk theih loh a, sorkarna a siam theih loh chuan duh a thlan theih lo,” a ti.
Duhoma chuan party thawhhonaa sorkarna siam dun a lo nih tawh dan sawiin, “District council-ah pawh kan hmu a, Congress leh MNF te pawh an thawk tlang a, BJP-te nen pawh an thawk tlang a, kha kha a ni mai,” a ti a, sorkarna siam theih tawh loh chuan chuti chuan a ni lo ang tih vel hi sawi lawk ngawt theih a ni lo tih a sawi.
Inthlanpui neihah party mala sorkarna siam an awm loh chuan sorkar intawm a pian theih dan sawiin, “Kan indawr ang a, kan inbe rem ang a, kan demand-te kan inpawm tawn theih kha chuan sorkarna chu a siam ho theih a ni mai,” a ti bawk.
Duhoma chuan kumin kum tawpa MLA inthlanpui neih turah party malin sorkarna an siam theih ngei an beisei thu a sawi bawk a ni.