Inrinni khan Bru Students’ Association, General Headquarters, Aizawl chuan an zirlai ti thate chawimawina leh infuihtharna hun an hmang a. He hunah hian Hachhek bialtu MLA Lalrindika Ralte-in khuallian niin a hmanpui.
Lalrindika Ralte chuan mahni hnam bil dam khawchhuahna chauh hi buaipui ber tur a nih loh thu sawiin, “Kan ram dinchhuahna hi kan buaipui zawk tur a ni. CYMA kumpuan, ‘Ram leh Hnam humhalh’ hian Mizoram chhung khawi hmun pawh a thleng pha tur a ni a, ngaih pawimawh a ngai a ni,” a ti.
Hachhek bialtu MLA chuan, “Thiamna leh finna hi chapo nan leh midang hmuhsit nana hman tur a ni lo a. Mahni mihring puite tana malsawmna kan nihna tur atana Pathian malsawmna kan dawn a ni,” tiin zirlaite a fuih bawk.
Bru Students’ Association-ah hian member 120 awm mekin, he hunah hian zirlai ti tha mi 55 hnenah lawmpuina certificate hlan a ni bawk.