Home Commissioner H. Lalengmawia’n Peace Accord MNF Returnees (PAMRA) leh Mizo Students’ Union (MSU) hruaitute, tun hnaia Meitei-te chungchanga thuchhuahte a sawi pui.
Inrinnia Home Commissioner pisa-a an inkawmnaah, H lalengmawia chuan tun thlenga Manipur tualchhung buainaa Mizoram sorkar hmalakna hrang hrangte a sawi a. pawl pahnihte thuchhuahin nghawng a neih theih tura uluk takin an sawi ho.
Thutkhawmah hian PAMRA hruaitute chuan thuchhuah an siamah Meitei te chu an sahimna atana Mizoram atanga inthiar fihlim tura an duh vang zawk niin an sawi a. Thuchhuah an siam tawh chu Meitei te himna atana sorkarin hmalakna a neih zui chhoh tak avangin Mizoram sorkar ngenna zahawm tak avang leh Mizo mipuite tana tha zawk tur a nih dawn chuan tiin, bawhzui zel loh tha an ti.
PAMRA chuan an thu chhuah hi Mizorama Meitei-te tihraltitna tur emaw, Mizoram atanga hnawhchhuah lam emaw a kawk lo tih an sawi a. Rilru tha takin, Mizorama Meitei awmte sahim zawk nana thu chhuah hi siam an nih laia, state pawn chanchinbu thenkhata ‘Quit Mizoram Order’ ang hiala thu an chhuah hi chu pawi an tih thu an sawi.
Home Commissioner hoa thutkhawm an neih zawh hian PARMA hruaitute’n All Mizoram Manipuri Association (AMMA) hruaitute chu Home Commissioner pisa-ah kawm lehin an thuchhuah chu rilru tha lo emaw, an mahni tiralti zawng emaw avang a tichhuak nilovin an sahimna ngaituah leh boruak tha lo awm thei ven nana an siam a nih thu an hrilhfiah a. Home Commissioner pawhin AMMA hruaitute chu an mi leh sate thlamuang taka Mizoram awm tura hrilh turin leh thu lengvak avangin Mizoram chhuahsan lo turin a ngen.
Inrinni vek khan Home Commissioner H Lalengmawia hian MSU hruaitute chu a pisa-ah a kawm a. Sorkarin Manipur tualchhung buaina chungchanga hma a lak dan leh Zohnahthlak unau raltlante a chhawmdawl mek dante chu MSU hruaitute a hrilhfiah a. Khawtlang leh NGO ten hemi kawnga sorkar an thawhpui dan leh ke an pen chhuah dan chu ropui leh lawmawm a tih thu a sawi.
MSU hruaitute chuan Mizorama Meitei awm mek te chungchanga hriat duh an neih te hre tura hmalak an tum hi Mizorama Meitei awm mekte hnawhchhuah leh tihthlabar tumna ni lovin, an him zawk nana tih a nih thu an sawi.
MSU-in Mizoram chhunga Meitei awm te chungchanga hriat duh an neih hre tura thil tih an tumah Mizoram sorkarin an thil hriat duhte chu a hrilh theih dawn avang leh sorkar hotuten an thil tum chu kal tlangpui lo tura an ngen avangin, an thil tum hi bawhzui zel loh an remti bawk.