Aizawl : Zirtawpni tlaia Khatla-a Royale Lalawi Hotel, Conference Hall-a Tuichang bial atanga MCS Combined Examination 2023-a Preliminary paltlanga, Main examination pe tur mi pangate nen inkawmhona neih a ni. He hun hi Tuichang bialtu MLA Tawnluia chuan a hman pui.
An inkawmhonaah Deputy chief minister ni bawk Tawnluia chuan a bial chhunga thalaite hmasawnna leh changkan zel nan theihtawp an chhuah zel tih sawiin, “Bial chhung khaw hrang hrang Welfare nen tang tlangin zirna lamah te, infiamna lamah te infuihphurna neihpui an ni thin a. Thalaite hmasawnna tur leh dawmkanna turin tha kan thlah lo a ni,” a ti.
Tawnluia chuan Mizorama sorkar hna lian thawktu tur laknaah a bial chhunga thalai panga an tel chu lawmawm a tih thu a sawi a. Sorkara senior officer hnen atanga thurawn leh fuihna tha tak an dawn te pawhin a puih ngei a beisei tih sawiin, tawngtaina nen bul tan a, Pathiana innghat chunga bei turin a chah.
Deputy chief minister Tawnluia chuan mi panga hnenah lawmpuina cheng singkhat theuh a hlan bawk.