Aizawl : Kumin MLA inthlanpui lo awm tura ZPM party-in Dampa biala candidate tura an ruat Vanlalsailova’n W. Phaileng PHC-ah Rs 75,000 man, YK Solar a hlan.
Thilpek hlanna hun hi TC Zahmingthangi (WS) in a kaihruai a, PHC-in an mamawh em em YK Solar manto tham tak mai petu Vanlalsailova chungah lawmthu a sawi.
Dr. Cindy Lalngaihawmi, MO pawhin thilpek hlu tak mai an dawn chungchangah lawmthu sawi bawkin, tun atang chuan a chhun a zana eng tha tak Medical Dept lam ten an nei thei tur chu hmasawnna duhawm tak a nih thu a sawi bawk.
Vanlalsailova chuan W. Phaileng PHC tana ngaihtuahna a lo hman ve tawh dan te, he damdawiin tana a hun leh tha a lo pek ve tawh te engmah ni lo mah se, a theih tawkah damdawi in tana thilpek pe thei dinhmuna Pathian kaihhruaina a chang chu lawmawm a tih thu a sawi.
Pathian leh mipuite zarah Dampa bialah MLA tana thlan tlin a nih chuan a theih ang tawk tawka hmalakna pawh kalpui chhunzawm zel a tum thu a sawi bawk.