Brazil defender Alex Telles chuan Manchester United chhuahsanin Saudi Pro League club Al-Nassr a zawm.
Kum 30 mi hian United tana a khelhpui thin Cristiano Ronaldo a zawm dawn a, a man zat leh a contract rei zawng hi club pahnihten puangzar lo mahse Pound maktaduai 6 man vel niin kum hnih contract a ziak niin British media thenkhatin an tarlang.
Telles hian kum 2020 khan FC Porto atangin Manchester United hi Pound maktaduai 13.6 in a zawm a, an tan vawi 50 inkhel hmanin goal khat a khung a, assist vawi 8 a nei.
Season liamta kha loan in Spanish club Sevilla-ah a hmang bawk.
Brazil tana vawi 12 inkhel tawh Telles hi 2022 World Cup-ah khan vawi hnih inlanin United-ah hian Luke Shaw nen khelhna hmun an inchuh thin a. Nimahsela season liamta khan Tyrell Malacia an lakluh hnuah loan in chhuahtir a ni tawh.
Ani bakah defender dang Eric Bailly pawhin Saudi lam hi pan tura ngaih a ni.