Kumin FIFA Women’s World Cup-ah a chetha pawla tel tura beisei an ni a, an inkhel hmasa berah erawh beisei angin an che lo. Netherlands in a vawikhatna atana World Cup khel Portugal an hmachhawn a, 1-0 in an hneh hram.

Dunedin Stadium a Pathianni a inkhelah Oranje Leeuwinnen tan hian Stefanie van der Gragt chuan first half tir lamah goal a khung a. He goal bakah hian khung belh lovin a tawp thlengin an hum.

Minute 13-naah Van der Gragt hian an goal neihchhun tur hi a tauh lut a. Goal-ah pawm ni lo hman mahse video assistant referee rawn a nih hnuah referee Kateryna Monzul chuan goal-ah a pawm.

Portugal tlarhma a bil a, second half tawp dawnah bak Netherlands goal-ah chance mumal an insiam lo. Mahse Dutch team pawhin an tum angin football an khel bik lo.

Ball chang tamin a nawrtu zawk ni thei thin mahse an remchang neihte a hmawr an bawk tha lo. Danielle van de Donk leh Lineth Beerensteyn te goal khung tur Portugal goalkeeper Ines Pereira chuan a save sak bawk a ni.

Hnehna an chan avangin Netherlands hi Group E-ah pahnihna an ni a, champion lai USA chu goal difference in an pha lo mek.

Sweden pawh an chak

Europe hmeichhe football a ram tawh khirh pawl ni ziah Sweden in South Africa hneh turin huntawp dawnah goal khung an mamawh a. Minute 90-naah Amanda Ilestedt chuan goal khungin 2-1 in an chak.

2022 Africa Cup of Nations champion South Africa hi hmeichhe World Cup-ah point la hmu miah lo an ni a, kum 2019 khan an tel hmasak ber niin an tlawm vek.

Tun tumah hian minute 48-naah Hildah Magaia hmangin an goal an khung hmasa a. Hei hi Frida Rolfo chuan Sweden tan a sut.

South Africa team an thawkrim a, an tlan taimak bawk avangin Sweden tlarhnung an chhaihbuai ve fo.

A tawpah erawh Sweden striker Kosovare Asllani corner pet an veng zo lova, Ilestedt-i’n chiang takin a tauh lut.

Inrinni inkhel lamah European champion lai England in Georgia Stanway penalty hmangin Haiti 1-0 in an hneh a, an goalkeeper Mary Earps chu an chak nan a pawimawh hle.