Manchester United leh Arsenal te pre-season inbuatsaihnaah an intawng a, English club inel tak pahnihte inkhelah Manchester United in hnehna an chang a. Penalty shootout neih ni bawkin Red Devils bawk hi an chak.

Pathianni zing dar 2:30 a New Jersey a MetLife Stadium a inkhelah hian United in inkhel pangngaiah 2-0 in hnehna an chang a. Mipui 82,262 hma a inkhel a zawhah hian penalty pet niin 5-3 in United bawk an chak.

Captain thar hovin

Manchester United in captain thar an nei – Harry Maguire chu captain a nihna hlihsakin Bruno Fernandes chu captain thar atan ruat a ni.

United captain thar hian first half-ah goal hmahruai a khung a. Yard 20 a hla atangin an goal hmahruai a pet lut a, Arsenal goalkeeper Aaron Ramsdale-a’n goal a chhuah ho viau.

First half-ah tho Gunners tlarhnungah defender Gabriel a chesual a, Jadon Sancho chuan chak taka tlan luhpuiin an goal hnihna a khung.

United tana chanchin lawmawm lo erawh winger Amad Diallo a inhliam a. Ivory Coast winger hian season liamta tha taka a hman hnuah beiseina sang tak neiin a club-ah a kir a, nimahsela hmun nghet khuar turin a theihna a phochhuak hman lo.

Inkhelh hma in chak an tum dawn tih sawitu United manager Erik ten Hag chuan, “Result tha tak a ni, kan inkhel pawh a lungawithlak. Ball chang turin kan thawkrim a, ball kan chanin tihsual kan nei tam lova, kan hmang tangkai thiam hle.” tiin inkhel a thlirlet.

Arsenal coach Mikel Arteta chuan, ‘Inkhel a hautak a, kan taksa kan la buatsaih mek. Tun tumah thenkhatte nawr deuh kan tum avangin kan khelh rei tir deuh.” tiin an inkhel a thlirlet.

Poch-a Blues chu

Chelsea manager Mauricio Pochettino hnuaiah Blues in pre-season inkhel a vawi hnihna atan an khel a. Brighton & Hove Albion chu 4-3 in an hneh.

Blues tan hian Senegal international striker lakluh thar Nicholas Jackson chuan goal khat a khung a, midang goal khung tur vawi hnih a siamsak.

Blues tan hian mi thar dang Christopher Nkunku chuan goal khungin Mykhailo Mudryk leh Conor Gallagher te pawhin goal an khung.

Brighton in Danny Welbeck hmanga goal an khung hnuah Joao Pedro penalty leh Deniz Undav ten goal an khung ve bawk.

Season liamta a Villarreal tana goal 13 khungtu Jackson hi Pochettino chuan fakin, “Chelsea in ani anga player talent nei tha an lakluh hi chuan a thiamna an hrechiang tihna a ni.”

“Talent nei tha a ni a, club-ah leh league-ah insiamrem tura hun kan pek erawh a ngai ang. Hei vang hian tun tuma kan inkhel ang hi a tan a pawimawh. Premier League inkhel boruak hriatthiamna tha tak a ni.” tiin a sawi.