Aizawl: Thawhlehnia NGO Coordination Committee-in Manipur-a Zohnahthlak unaute thlavang hauhna kawngzawh hlawhtling taka buatsaih a ni chu rorel lai, MNF party leh Congress party chuan lawmawm an tih thu an sawi.
MNF-in thuchhuah an siamah Zohnahthlak unaute thlavang hauhna kawngzawh hlawhtling taka neih a ni chu lawmawm a tih thu sawiin, Mizo mipuite tanrualna hian Manipur sorkar leh India sorkar a auh eih ngei an duh thu leh an beisei thu an tar lang.
Kawng zawhnaah hian Mizoram chief minister, MNF President Zoramthanga, Deputy CM Tawnluia bakah minister leh MLA rualte pawh an tel ve tih sawiin, “Zofa hmun hrang hranga chengten harsatna tawka an inpui an rawn pankhawm mek lai hian in-pui nih zo taka Mizoramin tlin taka kan unaute kan lo dawnsawn dan hi lawmawm a ti tak zet,” an ti.
MPCC pawhin Aizawl leh Mizoram hmun hrang hranga kawng zawh tihlawhtlingtu mipuite leh awmhmuna he kawng zawh lo thlawptute chungah lawmthu an sawi a. Mizoram leh hnam, sakhua humhim tura theihtawpa tangho zel turin Mizoram mipuite an sawm.
“Kan unau nekchepa awm mek Manipur-a mi te, Bangladesh-a mi leh Myanmar-a mi te harsatna tawkte tan theihtawp a chhuah zel dawn a. Hemi kawnga hmalatute a thlawp zel dawn bawk a ni,” Congress party chuan an ti.