Aizawl: Mara Autonomous District Council fur thutkhawm (Monsoon Session) chu nimin atang khan MADC Session hall-ah tan a ni.
MADC session kaihruaitu MADC Chairman N.Viakhu-a’n tun session chhunga Penal of chairman atan Tipa-II bialtu N. Beihu leh HC Biakcheuva, MDC-te ruat an nih thu a puan hnuah June 1, 2023-a boral ta, New Siaha bialtu H. Hrangchuanga sunna hun hman a ni a. Chairman-in a chanchin tlangpui a sawi hnu ah eptu lam leh ruling atangin H. Hrangchuanga chanchin leh an uina thu an sawiin, minute khat ngawi renga dingin a sunna hun hi hman a ni.
Hemi hnu hian zawhna leh chhanna hun hman nghal a ni a, ziaka chhan chi zawhna pali chu house dawhkanah dah niin, ka a chhan chi zawhna pariat chhan a ni bawk.
Chawhnu lam session-ah official bill pahnih – The Mara Autonomous District Council (Town Police) Bill 2023 leh The Mara Autonomous District Council (Town Council or Committee) (Third Amendment) Bill 2023 chu pharh a ni a. Hei bakah Official Rules panga house-ah introduce a ni bawk.