Central YMA, Mizo Zirlai Pawl (MZP), Mizo Students’ Union (MSU), Mizo Hmeichhe Insuihkhawm Pawl (MHIP) leh Mizoram Upa Pawl (MUP) te telna, NGO Coordination Committee huaihawtin nimin khan Mizoram chhung hmun hrang hrangah Manipur-a Zo hnahthlak unaute thlavang hauhna kawng zawh hlawhtling taka neih a ni.
Aizawl-ah chuan chawhma dar 11 atangin Chanmari Kawn leh Kulikawn atanga kawng zawh bul tan niin, larsap chenna, Raj Bhavan hmar lam gate-ah an intawkkhawm a ni.
An intawhkhawmaah thu sawiin NGO Coordination Committee Chairman R Lalngheta chuan, “Manipur-a kan unaute tawrhna hi a rapthlak a, a pawi kan tiin Mizo zawng zawngte kan rilru a na takzet a, kan thinlung a rum a ni,” a ti.
Manipur sorkarin Zohnahthlakte a venghim zo lo a, an in leh lo leh an biak in te halsaka nunna tam takin a tuar te, hmeichhe pawisawi lo saruaka sawisaka thah zui an ni te chu hriatthiam har an tih thu sawiin R Lalngheta chuan, “Mizo mipuiten en liam harsa kan ti a, kan ha chang kan thial mek a, India sorkar hian a rang thei ang bera he buaina hi a chin fel kan phut takzet a ni,” a ti.
R Lalngheta chuan Mizo mipuiten phuba lak an châk mek laia Mizoram mipuite tharum thawh lova an awm thei chu lawmawm a tih thu sawiin, “Mizo zia dik tak a lo lang chhuak niin ka hria. Tharum hmanga buaina chinfel hi thil harsa tak a ni a. Sorkarin he kan unaute buaina hi a chinfel thuai theih nan inpumkhatna tha tak nen tangrual ila, kan hnenah kan Pathian a awm a, an’in min hruai ang a, hnehna kan chang ngei ang tih hi i ring tlat ang u,” tia sawiin, NGO Co-ordination hmalaknate ngaichang thiama pawl mal bila thuchhuah siam leh hmalak pawp pawp hi a fuh ber lo tih hriaa insum theih nise a duh tih a sawi.
Central YMA president ni bawk, R Lalngheta chuan India sorkarin Zohnahthlakte hi khua leh tui a a ngai ve a nih chuan Manipur-a awmte buaina hi a rang thei ang bera chin fel an phut tih a sawi a. India sorkar hian a khua leh tuite ngei sahimna zawnga Mizorama raltlante tanpuina tur sum, Mizoram sorkar a la pe lo hi hriatthiam har an tih thu sawiin, “Inthliarhranna awm loa kan unau in leh lo kangral vek, hak lai nena Mizoram rawn raltlante tanpuina tur hi a rang thei ang bera pe ngei turin kan phut tlat a ni,” a ti bawk.
Central YMA General Secretary Prof Lalnuntluanga kaihhruai inkhawmah hian MHIP President Ngurmawii Sailo pawhin thu sawiin, Manipur-a Zo hnahthlakte tawrhna chu an tawrhpui thu leh an rilru a nat thu a sawi a. A bikin an hmeichhiatpuite chunga nghaisakna leh a huhova pawngsual an ni te, mualpho taka tihnawmnah an nih hnua thah zui an ni te chu an rilru a nat thu a sawi a. Hmeichhiate laka rawng taka chete lakah Manipur sorkarin hremna lekkawh ngei an phut thu a sawi.
Kawng zawh hi Chanmari kawn leh Kulikawn atangin zawh tan a ni a. Kawng zawh a nih hma hian Chanmari kawn-a MUP Vice President Lalbiakmawia Khiangte kaihhruai inkhawmah Central YMA Vice President Lalhmachhuana leh MZP President Lalnunmawia Pautu ten thu an sawi.
Kulikawna inkhawm tawi neihah Central YMA Finance Secretary Roneihthanga’n kaihruaiin, MUP President Nghaklianmawia leh MSU President Samuel Zoramthanpuia te’n thu an sawi bawk.
Aizawl-a Zo hnahthlakte thlavang hauhna leh tawrhpuina kawng zawha thawhlawm tlingkhawm chu Rs 10,17,970 a tling a ni.