Premier League club Liverpool in pre-season inbuatsaihna inkhelah German club Greuther Furth an hmachhawn a. 4-4 in an inhnehtawk.
Villingen a MS Technologie Arena a inkhelah hian Reds in tlarhma lamah hlauhawm takin khel mahse a hnung lam a nghet lova, tihsual an neih nasat chu an tuar.
Jurgen Klopp-a pawlte hian Karlsruher 4-2 a an hneh hnuah tun tum inkhelah hian goal khung an harsat lo tih an lantir a. Luis Diaz chuan first half-ah goal tha tak a khung.
Second half tan tirah tlarhnung chesualin Julian Green chuan German team tan goal a khung.
Darwin Nunez-a’n goal hnih khung chhunzawmin tlarhmaah Mohamed Salah nen an inkawp a hlauhawm. Mahse Greuther Furth tan Lukas Petkov leh Armindo Sieb te goal khungin beiseina a siam a. Huntawp Mohamed Salah chuan Liverpool si phurh a sut hram.
Liverpool tlarhnung nghet lovin fans te ngaihmawh hlawh mahse hmalamah erawh beisei tur a awm. Midfielder Alexis Mac Allister chuan a vawikhat nan bul a tan a, a tih tur ang nghet tha takin a ti nghal.
Kum 17 mi Ben Doak pawhin fak a hlawh a, first team player-te hmun a chuhpui thuai thei turah tam takin an ngai.
Manager Jurgen Klopp chuan, “Goal li chhuah hi tuman kan duh lo, mahse second half-ah football tha khelh kan tum a, kan che erawh a muang deuh thin a ni.” tiin a thlirlet.