AIZAWL: ZPM Leader Lalduhoma chuan mi thenkhatin sorkar mah se engmah an ni tak tak lo vang tiin sawi thin mah se, ZPM chu an danglam bik dawn tih a sawi.
East Tuipui bial fanga khaw hrang hrang tlawha zin ZPM leader hian Zirtawpni khan Khawbunga vantlang inkhawmah thu a sawi a. Pathian hnenah thawhpui tha, eiru lo tur a dil thin chu Pathianin a pe nia a hriat thu a sawi a. Tun hma atanga candidate ten an sawi ngam loh fo, ‘ka eiru dawn lo’ tih thu hi ZPM party candidate zawng zawngin mipui hmaa sawi fo thin tura an inchah thu sawiin, “Eirukna lakah pawh kan fihlim ngei ka beisei a ni,” a ti.
Lalduhoma chuan ZPM an sorkar chuan a kum khatna atangin kut hnathawktute tan an che chhuak dawn tih sawiin, “Thlai thar lei hi kan sum neih ang angin kan ti tan dawn a ni,” tiin, Mizo mipuite hi an rethei rei lutuk tawh a, eizawnna fumfe nei lo, damloh pawha damdawi leina tur pawh nei lo an tam lutuk, hunpui a lo hnai a, nu leh pa rilru a hah leh tan tawh a. Chemkawm technology hmanga an thawh thiam hmangin eizawnna bul an tan a ngaih thu a sawi.
Mi thenkhatin ZPM chu sorkar mah se engmah an nih tak tak loh tur thu sawi thin mah se, ZPM erawh an danglam bik dawn niin a sawi a. “Kan ram politics hi siam that kan tum a, kan duh takzet a nih chuan a chhungah zuan luh a ngai a, mi tha Pathian miten kan ram an enkawl a ngai. Pawn atanga au ngawta dam thei kan ni tawh lo, kan hma a lo kal tawhte tih ve ang ti ve tura min ring tlattute an awm thin a, keini chuan Pathian chakna nen kan chingfel thei tih kan hria,” a ti a. Pathian hian Mizoram hi siam that a tum nia a lan thu leh ZPM chu an danglam ngam bik a tul thu a sawi.
He hunah hian East Tuipui ZPM candidate Dr C Lalrammawia pawhin thu a sawi a ni.