Aizawl: ZPM Working President K Sapdanga chuan Durtlang leh Sihphir inkar kawng siam mekah hnathawh muang lutuk chu a ngaimawh thu leh he kawng siamtu, contractor chu ‘The New Kamrula’ tiin hmang an lo phuah fiam hial tawh niin a sawi.
Inrinni khan ZPM Working President hovin ZPM Media, IT & Publicity chuan Durtlang atanga Sihphir kawng laih zauh hna thawk mek an enfiah a. K Sapdanga chuan Durtlang atanga Sihphir kawng laih zauh hna hi kum 2018 MLA inthlan dawn khan chief minister hian a tlin hlauh chuan hna ngaih pawimawh hmasak bera neih a tiam zinga mi a nih thu a sawi a. RTI zawhna chhannaa a lan danin, Durtlang leh Sihphir inkar, kawng km 10.25-a sei siam thatna atan hian Rs vbv 46.57 ruahman a nih thu a sawi.
Kawng siam tur hian Mizoram PWD-in SLT Infracon Pvt. Ltd Hailakandi, Assam a thlang tih sawiin K Sapdanga chuan, “February 24, 2023 khan hna tan theih a ni tawh a, thla 18 chhunga thawh zawh tur tih a ni a, nakkum August thlaah zawh tur tihna a ni. Kumin March 11 khan ropui takin CM-in hna bul tan theihna chu a hawng a. Hna tan theih hnuah thla li dawn lai an chawl leh phawt a. Hna an tan mai theih loh chhan chu contract thuthlungah Mizoram sorkarin senso a lo pe phawt ang a, kum khatah vawi li (quarterly)-in Utilisation Certificate a siam chin zel kha Central Road Infrastructural Fund-in an rawn pe tur a ni,” a ti.
K Sapdanga chuan, “Hna bul tanna hi state sorkarin a neih remchan loh vang a nih hmel ber a. Hetih lai hian, contractor SLT Infracon hi Mizoram sorkar Treasury lamah chuan an che thei hle a, ni khatah bill pakua te an lehlan theia sawi a ni a, The New Kamrula tiin an hming an lo phuah fiam hial tawh a ni. Hna erawh an thawk muang hle,” a ti bawk.
ZPM Working President chuan, “Tunah hian Vaivakawn lamah leimin vangin lifeline kawngpui khar a ni a, phai lam atanga lirthei lian leh te chu Sihphir lama kal vek tura tih a nih tak avangin Home minister hova thukhawm chuan, Aizawl – Kawnpui via Sihphir chu lirthei veivah theih tura lo thianfai turin, contractor SLT Infracon chu a hriattir a. Lirthei veivak control turin traffic management a awm leh si lo a, Sihphir khawtlang tlawmngaiin zan rei tak thleng an duty ringawt mai a, hei hi enfiah thuai a tha hle a ni,” tiin, tunah furpui kan thleng mek a, he kawng siam hian mipui tan harsatna a siam nasa ta hle a, hnathawktute hian hmanrua an chhawp tlem hle a, hna hi a hun taka zawh a nih theih nan, Mizoram sorkar hian chak zawkin hma la turin a ngen nghal bawk.