MPCC Treasurer Dr Lalmalsawma Nghaka chuan Lok Ayukta-in CBI koh luhna tur thubuai pahnih nei tawh mah se, MNF sorkar chu CBI ko lut ngam loah a puh.
Mizoram Pradesh Youth Congress Committee (MPYCC)-in ‘Sorkar Tha leh Kalphung Dik’ tih thupui hmanga ‘Kan ram, kan hnam leh sakhua humhim tura beihpui thlakna street campaign’ a buatsaih kal zelah Inrinni zing khan ITI veng kawnah an chhunzawm a, he hunah hian MPCC Treasurer Dr. Lalmalsawma Nghaka chuan Congress Party President Lalsawta kaihhruaina hnuaiah dikna a lal a, sorkar tha neih theihna turin, mipuite dah hmasa thin Congress party chuan sorkarna siam ngei turin hma a lak thu a sawi.
Dr Lalmalsawma Nghaka chuan Congress sorkar kal tain bul a tan, Lok Ayukta pawh MNF sorkar chuan hna thawk tak tak thei turin an siam duh lo tih sawiin, “Lok Ayukta hian CBI koh luh theihna tur case pahnih an neih tawh pawh, MNF sorkar hian a ko lut ngam lo a ni. Congress party chuan a sorkar leh rualin Lok Ayukta hi tun aia nasa in kan thuam chak dawn a. An thawh tur dik tak kan thawhtir dawn a ni,” a ti.
Tun hnaiah Mizorama mi challang tak takin Congress party an zawm mek zel tih sawiin MPCC treasurer chuan, “Thenkhat phei chu sorkar a dinhmun pawimawh leh hlawh sang tak la reng thei, chung an din hmun kalsana Congress party rawn zawm te an ni,” tiin, ram, hnam leh sakhua a him zel theihna tura indona lian tak hmachhawn ngai a awm tih an hriat vanga Congress party zawm an nih thu a sawi.
MPCC treasurer chuan kumin MLA inthlanpui lo awm tur leh Lok Sabha MP thlan lo awm tur hi Mizo hnam leh sakhaw dinhmun sawi nghing vek thei anih avangin ngaihtuahna fim hmang a, duh thlang sual lo turin Zoram mipuite a sawm bawk.
MPYCC Senior Vice President Ngurdingpuia Pachuau kaihhruai street campaign-ah hian MPCC Special Invitee pahnih Lalnunmawia Chuaungo leh Lalbiakzama te pawhin thu an sawi a ni.