Ultimate Fighting Championship-ah champion kawnghren ni si lo, fighter tha te inchuh thin kawnghren siam a ni a. Hemi inchuh hian khawvela mixed martial artist hmuhnawm ber pahnihte an inhmachhawn. A tawpah erawh Just Gaethje dingchang zawkin, Dustin Poirier chu round hnihnaah knockout in a hneh.
UFC 291 hi Salt Lake City-ah neih a ni a, main event-ah hian UFC chanchin a vawi hnihna atan BMF title inchuhna neih a ni. Mipuite tan hlawh pahnih, an khingpuite kutthlak nasa thei tak, fighter huai pahnih an ni a. Beisei ang ngeiin cage chhunga an insual pawh a hmuhnawm.
Round khatnaah Poirier-a’n a khingpui chu khawih fuh ngunin chan tha zawk a chang niin lang mahse round hnihnaah minute 1 an inhmachhawn tling hman chiah tihin Gaethje-a’n a lu ah chiang takin a pet a. A kut dinga a hnek chu a ke in chhunzawm nghalin Poirier-a’n chiang takin a dawng a. Referee Herb Dean-a’n bout a ti tawp nghal.
25-4 MMA record nei Gaethje hian Poirier hi kum 2018 khan TKO in a lo hneh lo tawh a, tun tumah hian a hneh let ve chiah a ni.
A hmabak thlirin champion nih a tum thu a sawi a. “Lightweight championship inchuhna a inlan ka duh. October thlaah an intum dawn a, heta chak zawk hi ka hmachhawn duh. Chak emaw chak lo emaw, champion ni turin ka theihtawp ka chhuah dawn.” a ti a.
October 21 hian lightweight champion Islam Makhachev leh champion hlui Charles Oliveira te an inhmachhawn dawn.
Gaethje chuan sawi belhin, “He infiamna hi a rothap a, tlawm pawhin han insiamtha leh tura huntha inherchhuah loh chang a awm thin. Chuvangin tunah hetianga ka lo kir leh thei hi ka lawm hle. Dustin hi khawvela fighter tha ber zing ami a ni a, tun tumah a chak zawka ka tang hi thil lawmawm tak a ni.” tiin a sawi bawk.
Bout dang
Co-main event-ah middlweight champion thin Alex Pereira chuan light heavyweight a a inlan hmasak berah hnehna a chang a. Champion hlui Jan Blachowicz lakah split decision in a chak.
Pereira chuan, “Inbeihna hautak tak a ni a, chhuata inhmachhawn ka thiam tawh a ni tih lantir ka duh a, hma ka la sawn nasa hle dawn bawk. Ka rilru a awm ber chu champion nih a ni a, champion tumin thil kan ti tawh thin a, title chuh thei zinga tel thuai hi ka duh a, tunah hian ka inpeih.” tiin a sawi.