Aizawl : LAD leh PHE department-te tangkawpin nimin khan 15th Finance Commission Convergence chungchang zirhona Champhai-ah an buatsaih a. Champhai Bawrhsap James Lalrinchhhana’n a telpui.
Training ah hian Champhai District huamchhunga Village Council 62 President leh Secretary te an tel a ni.
Champhai Bawrhsap chuan Training on 15th Finance Commission Convergence chu khaw- tlang hruaitu VC-te tan intuaihriamna leh inrawnkhawmna hun tha tak a nih thu sawiin, VC kalkhawmte chu an hlawkpui ngei theih nan uluk leh taima taka inzir turin a chah a. VC-te chu ram hmasawnna bulthuta awm, khawtlang kaihruai tura mipuite thlan tlin an nih angin mahni khawtlang theuh thatna tura thahnemngai taka thawk thin tur leh an hna kaihhnawih dan leh thupek hrang hrang (The Lushai Hills District (VC) Act, 1953; The Lushai Hills District (Jhumming) Regulation, 1954; Mizoram Town (Sanitation) Ru- les, 1980; The Mizoram Animal (Control & Taxation) Act, 2014. etc) te bel taka hrechianga a nih tur anga kengkawh turin a chah.
Khawtlang an hruainaah hmathlir thui tak nei tura chahin khua leh tui nihna lehkha pek chhuah kawngah ah te dan anga fimkhur taka kalpui thin turin a chah a. An hmalakna hrang hrangte district administration hrilh hre fo thin tur leh an mamawh apiangte inthlahrung lova thlen thin turin a chah bawk.
Training-ah hian EE, PHE Er ZD Dengthuama pawhin thu sawiin, Geotagging, Open Defecation Free Plus (ODF+), Plan & Estimate, leh Gram Panchayat Development Plan (GPDP) Account Maintenance & Online Audit chungchang zirho a ni a. H. Lalenkawli, DPM Champhai, Julie C. Mawii, District Coordinator, Er Vanlallawma Colney JE PHE leh C. Vanlalhruaia, LAD te Resource Person niin training an pe a. TB natna chungchanga hriat tur pawimawh R. Lalmuanpuii, PPM Coordinator, District TB Control Society in zirtirna a pe bawk a ni.