Tualchhung football season intanna tournament a hman thin GIG Motors I-Day Football Tournament 2023 chu Thawhtanni khan khelh tan a ni a. Rajiv Gandhi Stadium-ah inkhel vawi hnih awmin FC Venghnuai leh Aizawl FC ten an khingpui an hneh.
Inkhel hmasa zawkah Electric Veng FC leh season liamta a final khel FC Venghnuai an inhmachhawn a. 3-1 in an chak.
Kuminah team pahnihten team naupang tak nei ve ve in season an khel dawn. An tan fiah lian ni dawn mahse an inkhel hmasa ber atangin an football a hmuhnawm.
Electric Veng in goal ban an pet per hmasak hnuah Joseph Lalsanglura hmangin goal an khung a. Mahse season hmasa ang thovin an tlarhnung an nghet rei thei lo. C. Ngurnuntluanga leh Vanlalhruaia ten goal an khung let hnuah J Lalbiakliana’n Venghnuai goal thumna a khung.
Inkhel hnuhnungah team tha ve ve Chanmari FC leh Aizawl FC an inkhel a. 4-3 in inkhel hmuhnawmah Aizawl FC an chak.
Aizawl FC in Lalrinzuala goal hnih bakah K Lalrinfela leh Augustine Lalrochana te goal hmangin hnehna an chang.