Formula One world champion Max Verstappen-a’n a world title pathumna tur panin hmalam a pan a. Kuminah a zawna vawi riatna atan pakhatna hauhin Belgian Grand Prix-ah a chak.

Pathianni zanah khawvela tlankawng lar Circuit de Spa-Francorchamps-ah F1 intlansiak neih a ni. Verstappen hian hun pawimawhah a dawhtheihna leh a puitlin tawhzia lantirin hnehna a chang. A teammate Sergio Perez chuan dawtin tun season a intlansiak zawng zawnga la chak vek Red Bull in dawhsan sang pahnih an luah.

Ferrari car khalhtu Charles Leclerc chuan pathumna a luah a. Italian team in tunhnaia an result-te thlirin hmasawnna nei mahse McLaren, Mercedes leh Aston Martin te nen Red Bull car tlanchak tak mai chu an la um pha meuh lo.

An chak bik em a ni!

Tun kartawp Belgium intlansiak tur khawchhia in a nghawng nasa. Hei chauh hi ni lovin sprint race neih a ni bawk.

Inrinni sprint race-ah Verstappen bawk a hmasa ber atanga tlan tanin pakhatna a ni a. McLaren rookie beiseiawm Oscar Piastri chu pahnihna niin parukna atangin Alpine khalhtu Pierre Gasly chuan pathumna a luah.

Intlansiak pangngaiah erawh Verstappen hian gearbox thar a hman a ngai a, dan anga a thlak theih chin a pelh tawh avangin grid penalty pek niin parukna atangin a tan.

Leclerc-a’n pakhatna atang tanin hma hruai nghal mahse a hnungah Red Bull car khalhtu dang Perez a dang rei thei lova, Red Bull in hma an hruai thuai.

Verstappen-a’n lap khat an tlan zawhin palina a luah a, a elpui hlun Lewis Hamilton chu umin lap 6-naah a pel a, British driver ropui tan dan theih a ni lo.

Pathumna a awm Leclerc chu lap 9-naah pel lehin lap 18-naah a teammate Perez a pel a. lap 44 intlansiakah Verstappen hian a tawp dawnah second 20 chuangin hma a hruai leh hman thova, hei hian tun season a chungnun bikzia a tilang chiang.

Formula 1 in nipui chawlh an hmang dawn a, Verstappen hian point 125 in a teammate Perez lakah hma a hruai. Tun thla tawpah inelna chhunzawm ni dawnin intlansiak 10 la awmah pawtthla thei an awm a beiseiawm tawh lo.

“Car tha neih chuan helai hmun hi intlansiak nawmna ber zing ami a ni. Kan car a tha tih ka hriat avangin inrintawkna lian tak ka nei.” tiin Verstappen chuan a chak hnuah a sawi.