Aizawl: Chief Minister Zoramthanga kaihhruaiin nimin khan Mizoram State Health Care Scheme Governing Body thukhawm chuan Asian Development Bank (ADB) duh dana Mizoram Health Care Scheme kalpui dan thlak danglam an rem ti.
CM Conference Hall-a thutkhawmah hian ADB-in MSHCS changtlung zawk kalpuina tura phalna an pek tawh chu a taka tihlawhtling tura tih tur tlem azawng la awmte sawi ho a ni a. ADB lamin duh dan an neih, tuna kalpui mek dan atanga thlak hlek hlek ngaite chu thlak rem tih a ni.
He thawhdunna hnuaiah hian mi tin huap (universal health coverage) health care scheme changtlung leh bill theih zat sang tak chu cashless system hmanga kalpui tur a ni.
Thutkhawmah hian sorkar kum kal meka AB PM JAY hnuaia beneficiary thun belh ngai la awmte thun belh rem tih a ni a, AB PM JAY hnuai veka sorkar damdawi inte bill tih dan phung pawh sorkar hospital thuneitute remtihna angin tihdanglam a ni a. MHCS hnuaia computer engineer-te chu an hming informatics officer tia thlak a ni bawk.
Tun dinhmuna health care scheme bill pek chhuah hmabak chungchang pawh thutkhawmah hian sawi lan niin, heng bill pek hmabakte hi sorkar sum dinhmun azira a rang lama pek chhuah zel an rem ti bawk.
Thutkhawmah hian Health Minister Dr. R. Lalthangliana, Health & Family Welfare Board Vice Chairman Dr. ZR Thiamsanga, MLA; Dr. Renu Sharma, Chief Secretary leh sorkar official pawimawh te bakah tlawmnga ipawl (non-official members) aiawhte an tel bawk.