World champion ni lai in beisei an la pha lova, an tum ram inhlangkai thei mahse FIFA Women’s World Cup hmasa pahnih ang la pha lo hle in Portugal nen an inhnehtawk.
Tlawm se tla tur an ni a, nimahsela goal inpe lova a vawikhatna atana World Cup khel Portugal nen an inhnehtawk avangin United States Women’s National Team in an mamawh point an hmu a, round of 16 an khel ang.
Eden Park a Group E inkhelah hian a zawna vawi thumna atana champion tum USA in an inkhel hmasa pahnih ang thovin goal khung an harsat. Vietnam laka an khel ang thovin an khingpuite an ngam viau a, mahse nghet taka inrem Portugal lakah goal an khung thei lo.
USA hian ball chang hnem mahse hlauhawm siam an harsat a, Portugal goalkeeper Ines Pereira chuan an huntha neih dansak thin bawkin huntawp dawnah Portugal striker Ana Capeta zawkin goal ban tih perin an ram a tlinpui teuh hle.
Vlatko Andonovski pawlte hian knockout stage khel dawn mahse an inkhel chu a tha tawk lo tih an hria. Veteran Alex Morgan chuan, “Kan chance neihho kha a then chu khung tur kan ni a, mahse kan ti thei lo. Kha kha kan mawhphurhna a ni.”
“Kan inkhelh danah kan lungawi lo, mahse hetihrual hian hmalam kan thlir a ngai a ni.” tiin a sawi.
Group E inkhel dangah Netherlands in goal sarih an khung a. An group-ah an sang ber.
Dutch team tan Esmee Brugts leh Jill Roord ten goal hnih ve ve khungin Lieke Martens, Katja Snoeijs leh Daniëlle van de Donk ten goal khat theuh an khung ve bawk.
Lionesses an inlar
European champion ni lai pawh world champion ang thovin an inlan tawh chinah beisei an la pha lo. Hnehna la chang vek mahse an player langsarte beisei angin an la che lo.
Nimahsela Thawhlehni ah Hindmarsh Stadium-ah England an insiksawi a. Goal ruk an khung.
4-3-3 a inrem thin England hi Sarina Wiegman chuan siksawi in tlarhnungah defender pathum a dah a. A hmaah Alessia Russo leh Lauren Hemp dah thungin English talent tha Lauren James chu an hnung chiahah a duh ang thal a tal turin a dah.
Ball thiam James hian goal hnih a khung bakah midang goal khung turah tum hnih a inrawlh bawk a. Beisei anga la che lo striker Alessia Russo pawhin goal khungin Lauren Hemp, Chloe Kelly leh Women’s Super League top scorer ni lai, Aston Villa striker left-wing back a khelh tir Rachel Daly chuan goal a khung bawk.
China goal khung awmchhun hi Wang Shuang in penalty atanga a khung a ni ve thung.
England hian round of 16-ah hian Group B a pahnihna, team tang thei tak Nigeria an hmachhawn leh dawn a ni.