Bishnupur district, Manipur-a Kangvai leh Phougakchao vela Ningania buaina chhuakah mi 17-in hliam an tuar a, Army leh RAF ten a thelh nan tear gas-in an kap bawk tih thuneituten an sawi.
Imphal East leh Imphal West district magistrate ve ve chuan a hmain curfew puan an thlahdul a. Imphal phaiah hian zan lamah chauh inkhuahkhirhna hi kalpui ni tawhin chhun lam chu an titawp rih tawh a ni.
Buaina a chhuah hma lawk hian Kuki-Zomi ten Manipur-a tharum thawhna thleng meka thite a huhova vui an tum chu an state high court-in zingah khan an phum tumna hmun, Churachandpur district-a ram chu khawih rih lo tura a tih avangin an thulh bawk.
Tribal pawl lian ber, ITLF pawhin Churachandpur district leh Bishnupur district inrinaa awm, Hailai khuaa mi 35 phum an tum hun chu an sawn hla leh tih an puang bawk.
Bishnupur district-ah hian zing atangin boruak tang tak a awm nghal a, tual chhung mi sang chuangte chuan venhim hna thawktute chevel tur dan tumin kawtthlerah an chhuak khawm.
Hmeichhiate hruai mipuiin Army leh RAF-in dalna an siam chu paltlang an tum lui a, mi phum an tumna hmun, Tuibuong pana kal an tum a ni.
State sorkarin Imphal East leh West district-ah chuan chhun lam bikah curfew hi a thlahdul tawh.
District magistrate pahnihte hian buaina a awm leh tak avang hian venthawn thilah inkhuahkhirhna hi an kalpui thar leh a ni.
May 3 atanga hmarchhak state-a chi leh chi inkara buaina chhuak tan tawhah hian mi 140 vel thi an awm tawh a, mi sang tam takin hliam an tuar a. Chenna in sang chuang hal chhiat ni tawhin sakhaw hmunte pawh suasam a ni a. Baihvai taka awm mi sing tel an awm phah tawh bawk.
Buaina hi Meitei-ten scheduled tribe-a awm ve an dilna chu Kuki-ten duh lovin an dodal a, kawng zawh puitham tak an huaihawt atangin an inkarah buaina a chhuak ta a ni.