Pakistan ram hruaituin an hmelma kumhlun, India nena inbiak a sawi rik tukah United States chuan Asia chhim lama nuclear ralthuam nei ram pahnihte inbiak hi a thlawp hle tih a sawi.
Pakistani Prime Minister Shehbaz Sharif-a chuan Thawhlehni khan India nena inbe turin an inpeih tih a sawi.
Kum 2019-a New Delhi-in a awp chin Kashmir hung bikna a hlih atang khan Pakistan nen hian an inkar a tha lo zui hle a. Pakistan pawhin a ram nia a chhal, Himalaya tlangdunga awm Kashmir hi a hma zawngin a hranpaa inenkawlna nei thin a ni a, hemi dan hi India chuan a thiat a ni.
Kum 1947-a British rorelna atanga indanga ram pahnih a pian hnuah Kashmir chungchang avang hian vawi thum an indo tawh.
“Tute pawh, kan thenawmte ngei pawh dawhkan kila thil pawimawh sawipui turin kan inbei a, a chhan chu indona hian eng thil mah a thlen lo miau a ni,” tiin Sharif-a hian Islamabad-ah a sawi a ni.
Sharif-a thu sawi chungchangah hian US Department of State thupuangtu, Matthew Miller chuan US chuan ram pahnihte inbiakna chu englai pawhin a thlawp reng tih Nilaini khan a sawi.
“A hma atanga kan lo sawi tawh thin angin, an buainaa India leh Pakistan inbiak hi keini chuan tha kan ti reng a, chu chu kan dinna pawh a la ni,” a ti.
India hian a awp chin Kashmir-a kum tam tak helna awm tawhah helho hi pui thinah Pakistan a puh a. Pakistan hian phain mahni kea an din theihna tura palai hna thawhah chauh a pui niin a insawi thung.
Ram pahnihte inkar hi August 5, 2019-a India-a rorel lai, Hindu sakhaw zuitu, Prime Minister Narendra Modi-a sorkarin Kashmir hung bikna thiata New Delhi atanga a awp zui atangin a khi zual.
Sharif-a hian Thawhlehni khan ram pahnihte hian hma lam an thlir a ngai tih a sawi a, tun hmaa an lo indona leh tuna an buai mekna zawng zawng chuan retheihna chauh a thlen niin a sawi.
Tun tum hi Sharif-a’n India nena inbiak a duh tih a sawi vawi hnihna niin January-a United Arab Emirates a tlawh khan a lo sawi tawh.
Emirati chanchinbuin a kawmnaah Sharif hian UAE chu India-Pakistan inbiaknaa palai hna thawk turin a sawm tih a sawi.