Inthlan politics a lum chho tan a. Party ten candidate tur an la final kim lo deuh bawka candidate leh candidate inbeihna aiin party leh party inbeihna thawm a ring ta viau. A ruh zual an tih mai party workers ten khua an hmu lo tan a. An duh zawng lam mipui rilrua tuh tumin thawm mak pui pui, social media a in chhaih kual a nasa tan a. Mahni party policy zawrh aia midang candidate tur niawm deuh han khaikhin kual vel thawmin social media a luah nasa ta hle bawk. Engnge kan an chhoh zel ang phei chu a hriat lohva, tunah rih hi chuan mipui hian party te thu kan la ngaichang lutuk lo ni te pawhin a lang a rih.
Hetih rual hian kan political party-teah thil lawmawm nia lang chu politics a sum sen tlem tha an tih thu an sawi hlawm a. Congress president Pu Lalsawta chuan sum an hmachhuan loh tur thu a sawi zing hle. Chutiang bawkin ZPM lam hotute pawhin an sawi ri ve tho bawk. Ruling lam MNF hian sum sen chungchang an sawi ri tlem hle thung. Engpawhnise, sum sen tamin a nghawngchhuah thil tha lo hretu vek kan ni a. MNF party pawh hian he thu hi an tlangaupui chho thuai turah ngai ila. Sum sen a tlem chuan inthlan zawha sawrkar lo piang turah pawh beiseina kan nei sang lehzual thei ang.
Party te sum hekna rapthlak tak pakhat chu anmahni party workers te sum demand hi a ni. Chet velna tur sum candidate te hnen atangin an han la chhuak a. Candidate ten party tih lungawi loh hlauin an thu an hnial ngam si lo. An demand tawk tawk a. Petrol man, chaw eikhawmna, chumi khami dam lo kan a ngai, motor hire a ngai an han ti a. Block president hum zat tur, unit hruaitu in a hum zat tur an han bithliah nghauh nghauh mai hi chu a zahthlak takzet a. An humchhuah chuan vote a hmuh phah em tih pawh hriat loh, sum chu a kal hem hem mai a. Kan mipuite, kan party hruaitute hian sawrkar tha, eirukna lak ata fihlim kan duh vek a. Heng zawng zawng hi tih tawh loh kan inzirtir a. Kumin inthlan turah hi chuan ziaawm lam a pan ngei dawn niin a lang tan. Engpawhnise, tun kum inthlanah hi chuan party te tlangau hla hian nghawng a nei tha ngei turah ngai phawt mai ila, i beisei bawk ang u.